Rekordpåmelding til Breidablik opp

Deltakartalet hadde passert 88 då HF gjekk i trykken torsdag. Den førre rekorden var på 62 påmelde. Auken i deltakartal har vore jamn heilt sidan 2017, fortel arrangør Arne-Kristian Glück-Teigland. I tillegg har presset på Breidablik vorte større etter at Bergen og Hordaland turlag bygde ny hytte på staden.

– Det er mange spreke folk som vil springa. Mangelen på andre løp dette året kan ha gjort at endå fleire av desse har fått augo opp for Breidablik opp, seier han.

Flest tilreisande

Av dei påmelde er berre ein handfull lokale. Det er uvanleg, ifølgje Glück-Teigland. Tilreisande kjem frå mellom anna Bergen, Voss og Oslo for å delta. Anita Iversen Lilleskare sette løyperekord for damer i fjor på tida 55.19 og stiller på startstreken att i år. Det same gjer fjorårsvinnaren på herresida, Thorbjørn T. Ludvigsen. Rekorden for herrar vart sett av Stian Angermund-Vik i 2018 og lyder på 42.35.

Snøen har smelta mykje den siste tida, men det er framleis meir snø enn det plar vera, ifølgje Glück-Teigland. Det kan gjera det vanskelegare å slå nye rekordar.

– Det kan slå begge vegar. Er det kaldt nok, kan ein springa fort på snøen. Ein skal likevel ha god teknikk og motor for å halda eit like godt tempo på snø som på tørt underlag.

– Gått i regn før

Det melde regnet og kalde vêret treng ikkje vera negativt for løpet, meiner Glück-Teigland.

– Folk har gått til Breidablik i regn før, og dei klarar det nok i år òg. Det er nesten betre at det er litt kaldt enn at det er for varmt, sjølv om det er synd at ein ikkje får nyta utsikta like mykje.

Koronasituasjonen har ført til at hytta på Breidablik ikkje kan nyttast av løparane. Premieutdelinga er difor flytta til Holmatun. I tillegg gjeld enkelte smittevernreglar.

– Reglane for slike arrangement er få, men tydelege, og det er enklare å halda dei utandørs. Alle skal halda ein meter avstand, og ingen får delta om dei er sjuke. Maksgrensa på 200 personar held me oss innanfor.