Rekordar stod for fall

Deltakarane kom frå skeiseklubbane Hardanger, Bergen, Fana og Austrått. Eit klart fleirtal – 15 – kom frå arrangørklubben Hardanger, opplyser klubb- og stemneleiar Brynjulf Måkestad.

Ei rekkje av borna som deltok, sette personleg rekord. Nantawat Duangkaew, til dømes, gjekk 500 meter på 50,79 sekund. Berre Joakim Haara frå Austrått var hakket snøggare i klassen. 1.000 meter gjekk kvemmingen på 1.51,11, også det personleg rekord.

I dei yngre klassane gjekk Vimalin Sørstrømmen og Selma Agata Pfeil Vikøy 250 meter på høvesvis 34,59 og 36,70 sekund i klassen for 12-åringar.

Kristoffer Songstad frå Fana sette to nye banerekordar: 1.31,76 på 1.000 meter og 4.48,50 på 3.000 meter.

Den yngste deltakaren var 4 år gamal. I veteranklassane deltok Eric Clement, Sigve Espeland og Joar Kvittingen.

Fleire elevar ved Framnes Kristne Vidaregåande Skule måtte melda pass på grunn av koronasmitte, opplyser Måkestad.