Løparane er klare til fellesstart i det varme vêret ved Storeteigen.

Rekordar stod for fall

Det vart ny løyperekord i båe klassar i Hardanger halvmaraton laurdag.

Sigbjørn Linga
Bladstyrar
Publisert Sist oppdatert

Tage Morken Augustson frå Varegg var suveren i det 21 kilometer lange løpet mellom Storeteigen i Øystese og Lidarende. Med tida 1.09.44 var han ikkje berre 4.16 minutt betre enn nummer 2, men slo i tillegg løyperekorden til Tore Akerlie med 9 sekund.

Dei tre beste samla etter løpet. Frå venstre: Erlend Drivenes, Tage Morken Augustson og Kim Are Bull Hansen.

Kvinneklassen var ikkje dårlegare. Anita Iversen Lilleskare frå BGF Bergen Løpeklubb vann og sette rekord med tida 1.22.38. Den gamle, på 1.23.21, tilhøyrde Ingrid Ukkelberg. Samanlagt vart Lilleskare nummer 8.

Bestemann av dei lokale var Erlend Drivenes frå Tørvikbygd, som med 1.14.00 vart nummer 2 i herreklassen. Øystein Brurok, også han frå Tørvikbygd, vart nummer 14 med 1.28.44. Mellom kvinnene var Hilde Bjørke frå Øystese den beste kvemmingen. Tida 1.43.28 heldt til 6.-plass.

I alt 107 – ny rekord – stilte til start i det fine vêret. Mellom mange trauste kvemmingar og tilreisande nordmenn var ein italienar som hamna på 4.-plass og ein israelar som hamna på 7.-plass. Deltakarane fekk ei viss underhaldning undervegs, all den tid dei måtte passera det tidvis røykfylte arrangementet Wings & Wheels to gonger.

Ein av deltakarane fekk helseproblem i innspurten og vart frakta bort med luftambulanse, men det skal ha gått bra med vedkomande.

Arne Lunestad (t.v.) og Øyvind Soldal i sekretariatet.
Før start. Parallelt med maratonen vart det skipa til familiedag på Storeteigen.
Startskotet har gått.
Sami Alp frå Fil Aks-77.
Morten Kolltveit sprang like godt med barnevogn.
Marit Eggen frå Bergen har krefter til eit smil til fotografen.
May Britt Soldal, opphavleg frå Soldal, og Frank Eikeland frå Stavanger.
Hilde Bjørke frå Øystese viser vinnarintensjonar.
Også Marit Rogde verkar å vera sjølvsikker.
Elisabet Aarekol (t.v.) frå Øystese og Janne Stensletten frå Strusshamn.
Øystein Brurok (t.v.) frå Tørvikbygd og Bjørn Harald Bongom frå Varegg.
Andre Bjugstad frå Brøttum på Straumbrua.
Barnevogna heng framleis med Morten Kolltveit på Straumbrua. Han vart til sist nummer 27 med tida 1.39.58 – og det var ikkje ein eigen klasse for barnevognførande løparar.
Saftstasjonen ved Straumbrua.
Kjerstin Valland frå Øystese får væskepåfyll av Edwin Hereid og Isak Herfindal Hereid i Norheimsund.
Isak Herfindal Hereid tok på seg å vera saftleverandør.
Dei frivillige kan juksa litt når dei flyttar på seg. Her tek Nils Ove Børve innpå Stian Haugen.
Torstein Valland Fykse held motet oppe mellom Norheimsund og Vikøy. Han hadde ikkje sprunge så langt som ein halvmaraton før, og var nøgd med å slå mamma Kjerstin.
Simon Andersen frå Nesttun nærmar seg Vikøy.
Frå venstre: Ulf Hiis Bergh, Tore Tangenes og Birgitte Berentsen.
Den soleklare vinnaren, Tage Morken Augustson frå Varegg, er godt over halvvegs.
Vinnar Tage Morken Augustson kryssar Straumbrua for andre gong i einsam majestet.
Kvemming Erlend Drivenes hadde god kontroll på 2.-plassen. Her er han på Straumbrua.
Berre fem sekund skilde øystesemennene Odd Arne Botnen (nærast) og Eirik Kvarv. Her kviler dei ut etter spurten.
Anita Iversen Lilleskare tok seg ut og sette ny rekord.
friidrett sport øystese
Laga med Labrador CMS