Reknar med opne skianlegg

Furedalen Alpin reknar med å halda ope i vinterferien til kvemmingane og bergensarane komande veke. Regn og mildvêr den siste veka har redusert snømengda, men dagleg leiar Jan Guttorm Skeie seier torsdag at han reknar med å kunna ynskja folk velkomne til skitrekket.

Torsdag regna det mykje, så fyrst fredag set Skeie og kollegaene i gang med å preparera løypene att. Då vil han vita meir om stoda og utsiktene.

I den kalde månaden tidlegare i vinter var skitrekket utselt for dagskort kvar helg. Likevel måtte verksemda klara seg med om lag ein tredel av normal omsetning, på grunn av smitteverntiltak og redusert kapasitet. Dagskorta vert for tida berre selde på nettet, for at det skal vera mogeleg å driva smittesporing.

Eikedalen skisenter har stengt alle heisane inntil vidare. Også her må ein venta med å utbetra løypene til etter regnvêret har stoppa, truleg fredag. Då vil verksemda orientera om opningstider og tilgjengelege heisar i vinterferie. Alle som har kjøpt dagskort medan anlegget har vore stengt, får bruka dei seinare.