Reiser til NM med ungt lag
I helga skal U19-gutane til Rossvoll Volleyballklubb prøva seg mot dei beste laga i Noreg.
Det skjer når noregsmeisterskapen i klasse U19 vert arrangert i Ålesund frå fredag til sundag. Jentelaget makta ikkje å kvalifisera seg til meisterskapen, medan gutelaget kvalifiserte seg ved å verta blant dei fire beste laga i regionmeisterskapen.
Trenar Jon Erlend Haukås fortel at laget har moderate ambisjonar. Årsaka er at det er svært ungt.
– Me reiser med eit lag som består av 16 og 17 år gamle spelarar. Mange av motstandarane har spelarar med erfaring frå eliteserien og U19-landslaget. Målet er først og fremst å få erfaring. Spelarane skal få kjenna på nivået. Me gjer så godt me kan, men det vert nok tungt å få ei topp-plassering, seier han.
I midten av april skal både gutelaget og jentelaget delta i U17-NM i Haugesund.
– Eg trur erfaringa frå Ålesund vil vera svært nyttig i Haugesund, seier han.
