Regn og sol, men ingen rekord
Sundag arrangerte Øystese idrettslag Hardanger halvmaraton for 4. gong. 94 lauparar sprang den asfalterte traseen.
Hardanger halvmaraton er 21,1 kilometer langt. Start og målgang er på Storeteigen i Øystese. Laupet går på veg og fortau, og lauparane snur på Aksnes.
Mange i sving
Kring tjue frivillige bidrog til at arrangementet vart som det skulle. Laupsleiar Arne-Kristian Glück-Teigland fortel at det i år vart laupsdag sundag på grunn av mindre trafikk, særleg i sentrum. Avkøyrsler, fotgjengarovergangar og drikkestasjonar var godt bemanna av frivillige.
Øyvind Soldal var parkeringsvakt og speaker i målområdet. Han oppmoda publikum om å gjera stas på deltakarane.
Ein bør vera her til alle er komne i mål, oppfordra han publikum og utslitne deltakarar.
Raske deltakarar
Einar Grilstad frå Melhus Ungkarsklubb vann herreklassen suverent med tida 1.17.49, vel 8 minutt bak løyperekorden frå i fjor. Grilstad leia lenge og sprang einsleg over mållina. Sprekingen opplyser at det var fyrste gong han sprang distansen.
– Løypa var god å springa i. Det var mindre stiging enn eg hadde venta, fortel han.
Raskaste dame vart Jori Mørkve frå Voss idrettslag. Ho kom i mål og vann med tida 1.28.51. Ho var den 13. personen som kom i mål.
Eirik Kvarv var spent før startskotet til årets halvmaraton. Han har trena godt i fjella i sommar, men var usikker på korleis jogging på asfalt skulle gå. Det viste seg at det gjekk ganske bra. Kvarv representerer Øystese Idrettslag, og vart beste lokale utøvar med tida 1.25.33 og 7.-plass. Nest best av dei lokale heltane vart Ådne Kjosås med 1.28.02.
Øystein Dybdahl var eldst i feltet. 64-åringen sprang inn til tida 1.42.55 og vart nummer 47 over målstreken.
Ekteparet Hilde Bjørke og Mathias Dahl Ellingsen sprang løypa saman i år. Bjørke hadde ei alternativ opplading i form av utdrikkingslag dagen før. Likevel sprang dei inn til tida 1.42.51 og delte 45.-plassen.
Nøgd med det meste
Laupsleiar Arne Kristian Glück-Teigland var særs nøgd med gjennomføringa. Dei frivillige var gode og pålitelege. Det var svært godt humør blant deltakarane, og ingen skadar eller uhell oppstod, opplyser han til HF.
Maratonen vart avvikla i svært vekslande vêr, med dosar av både sol, regn og vind.
Sjå fleire bilete frå halvmaratonen her:
