Poengdeling for A-laget

Det var ein jamn fotballkamp i 5. divisjon på Øystese stadion. Både heimelaget og bortelaget hadde store sjansar før pause, men ingen av dei fekk ballen i mål. I andre omgang vart det hard kjemping for poenga. Begge laga hadde fleire høve til å sanka med seg alle poenga. Keeper Vinjar Voster bidrog sterkt til at eitt poeng gjekk til Øystese/Norheimsund.

Øygarden var farleg frampå ved fleire høve. Også heimelaget hadde sjansar. Øyvind Floen Berge nikka i stolpen etter 70 minutt, etter eit perfekt innlegg frå Eivind Madsen Skeie. Same mann vart dregen ned i feltet på overtid, men dommaren vinka spelet vidare.

Krampe råka fleire av spelarane utover kampen, og heimelaget måtte nytta heile troppen. På overtid kunne Øygarden ha teke med seg alle poenga, men slik vart det ikkje. Dermed enda kampen 0–0. Tord Myrvold Aksnes fekk raudt kort etter kampslutt.

Hovudtrenar Denis Ljubovic er nøgd med det laget viste mot Øygarden. Han påpeikar at laget har mista mange sentrale spelarar i haust, og at laget lyt «spelast inn» på nytt. Vidare rosar han dei rutinerte spelarane for å halda nivået oppe. Samtidig skryter trenaren av utviklinga til Kevin Matare og Are Tvedterås Fagervik. Han er særs imponert over eigen keeper.

– Eg synest spelarane kjempa hardt. I tillegg har me ein veldig god keeper som var banens beste. Eg er veldig fornøgd med banespelet, og er stolt over gutane, seier Ljubovic.

Etter to seksmålstap etter sommaren slo kvemmingane Fri 2–1 30. august. Sidan vart det 3–6-tap for Varegg 2. 8. september. Øystese/Norheimsund har 21 poeng og ligg på 7.-plass på tabellen. Laget møter Valestrand Hjellvik på Osterøy komande fredag.