Planlegg bane for diskgolf i Jondal

Ein del skog er allereie felt, og meir skal bort, i friluftsområdet ved Djupaviki nedanfor bustadfeltet i Sætveithagen i Jondal. Om lag 40—45 mål skal takast i bruk til diskgolf- eller frisbeegolfbanen – alt med kommunal velsigning, vel å merka.

— Det er eit lyft for lokalmiljøet å ha noko anna å driva med. Ein treng ikkje samla 22 her. Det held med nokre kompisar, og ein kan spela når som helst, seier Sondre Jensen Toen, jondøling og ei av dei frivillige eldsjelene som står bak ideen.

Saman med kompisane Kai-Morten Omdal og Vegard Refvik har han vorte hekta på sporten ved å prøva han andre stader — ettersom det ikkje har funnest ein «heimebane». No vonar dei å bidra til å gje heimstaden tilbodet.

I dag er det næraste alternativet på Hatlestrand, om ein ser bort frå at Framnes Kristne Vidaregåande Skule og Kvam ungdomsskule har nokre korger.

Hjelp frå laksen

Det meste av kostnaden vert dekt inn med dugnadsarbeid, men likevel kan anlegget koma til å kosta kring 150.000 kroner. Jondal idrettslag, som har regien i prosjektet, har teke på seg å garantera for pengane, men laget kjem til å søkja om stønad både her og der.

Den fyrste søknaden gjekk tidleg i mai til Bremnes Seashore AS, som fredag overleverte ein fysisk stor sjekk med ein uvanleg stor sum: 25.000 kroner. I tillegg stiller selskapet med gratis lån av fliskuttar. Selskapet har fire oppdrettsanlegg i Jondal.

— Me vil leggja til rette for lokalsamfunnet og gjera det attraktivt å vera her. Me likar å støtta litt nye ting, så det vert litt anna enn fotball og korps. Me kom fort til at me ville støtta dette med meir enn me plar, seier samfunnskontakt Bjørnar Michaelsen-Svendsen.

Fleire gode hjelparar er med på laget. Privatpersonar stiller med mellom anna traktorar i tillegg til dugnadsinnsats. Bygger´n i Jondal donerer gratis materialar til utkastplattingane, som er fem—seks rutemeter store og vert dekte med kunstgras.

— Me er avhengige av stønad, seier Jarle Jensen Toen, som organiserer det heile på vegner av idrettslaget.

Han reknar med at det fort kan verta naudsynt med 250 dugnadstimar for å koma i hamn med prosjektet.

Må forklara konseptet

Fredag hadde 16—17 personar meldt seg til å vera med på dugnaden i helga. Jarle Jensen Toen påpeikar at ein må forklara ein del av dei kva det er dei bidreg til.

— Dei fleste veit ikkje kva det er, seier han.

— Ingen har interessert seg for det her, sidan det ikkje finst banar. Me håpar dette kan bli interessant for folk her òg, seier Sondre Jensen Toen.

Han er full av lovord om idretten. Til dømes er inngangsbilletten rimeleg. Ein treng berre eit enkelt startsett med diskar for kanskje 500 kroner for å setja i gang. Undervegs får ein både samvær og litt trim – og kjennar litt på konkurranseinstinktet, om ein vil. Det er ikkje uvanleg å tilbakeleggja bortimot 10.000 skritt på ein runde på ein full bane med 18 hol, fortel han.

Med ein eigen app kan ein både studera banen og halde orden på poengtavla. Når det dannar seg eit miljø, er det vanleg med ein fast dag – «vekegolf» – for dei som vil dra det litt lenger og konkurrera mot einannan.

Profesjonelle krefter

Med på laget er utstyrsleverandør og banedesignar Remi Kvalvik i Aceshop AS. Sjølv om det er fullt mogeleg å laga ein «heimelaga» bane, ville gjengen ha med seg profesjonelle krefter for å sikra seg både ein skikkeleg bane og godt utstyr.

— Me ville gjera det litt skikkeleg når me fyrst dreiv på, og få med ein som har mykje erfaring med bygging av banar, seier Toen.

Røynsle har Kvalvik, som har diskgolf som heiltidsgeskjeft, fått rikeleg av. Dei siste to åra trur han at han har vore med på byggja kring 17 banar. På ein bane i Sandnes er det ikkje uvanleg med 550—600 spelarar dagleg, fortel han.

Sporten har formeleg eksplodert dei siste åra. Ikkje minst det siste året har koronaviruset ført til vekst i populariteten for aktivitetar der det er mogeleg å halda stor nok avstand til kvarandre – som denne.

Jarle Jensen Toen fortel at den fyrste utkastplassen vert like ved badestranda i Djupaviki, som frå før er utstyrt med både toalettanlegg og parkeringsplass. Der vil det dessutan verta plassert ei frittståande korg, slik at brukarar av området kan prøva seg. Likeins vil det truleg verta plassert ei korg ved badeplassen i Vik.

Det langsiktige målet er å utvida banen til 18 hol. Det finst nemleg meir friareal å ta av ved Sætveithagen.

— Me får sjå korleis aktiviteten vert på denne banen i eit par år fyrst, og så får me sjå, seier Toen.

Les også: