Påskemoro i Herand
I år som i fjor stilte fleire opp på startstreken då Fodnastølsrennet vart arrangert 1. april.
Skirennet, som finn stad i turskiløypa Vassenden–Fodnastøl, vakna i fjor vår opp frå ein kring femti år lang dvale. Arrangør Herand Idrettslag konkluderte då med at tilstellinga var så vellukka at rennet vart skipa til på nytt i helga. Det opplyser nestleiar i laget, Margreta Sandvin Eiken.
Strålande sol og nypreparerte løyper møtte dei frammøtte laurdag føremiddag. Løpet hadde både start og målgang ved Fodnastølsbua, som ligg ved skiløypa.
Ifylgje Eiken deltok både fastbuande og gjester i ulike aldrar i løpet, som bestod av to klassar – éin for born og éin for vaksne. Ettersom målet til arrangørklubben er å skipa til eit uhøgtidleg renn, vert det ikkje stilt krav til utstyr eller teknikk, opplyser Eiken til HF.
Medan alle borna vart premierte, fekk den fyrste vaksne løparen som passerte målstreken, ei skål med påskesnop. Dei som ikkje hadde startnummer på brystet, syrgde for å laga liv og røre i løypa, ifylgje Eiken.
Også påskeharen hadde funne vegen til Fodnastøl. Han hadde gøymt rebusoppgåver som borna kunne løysa. På vinnaren venta eit stort og fullt påskeegg.
– Dei frammøtte var med på å gje påsken ein fin start, konstaterer Eiken.
