Padla i gang friluftsåret

I «padlenaustet» ved Strandebarm Marina ved Tangeråsneset heng mellom anna fleire ståbrett og titals kajakkar og kanoar, årar og vestar på rekkje og rad og ventar på å verta tekne i bruk.

Laurdag kom seks av kajakkane i drift då ein liten gjeng padlarar møttest for å padla frå bryggja og leggja ut på den blikstille, skoddedekte fjorden. Målet denne dagen var Linga.

Dit kom dei ved å fylgja land, ettersom det kan vera risikabelt å ramla i vatnet langt utpå fjorden vinterstid. Det fortel Mona Svanevik Ekanger, ein av frontfigurane og padleentusiastane i sjøsportsgruppa til Strandebarm idrettslag, kalla SjøAktiv.

Sjølv byrja ho padla om lag då ho og ektemannen, Adler, kjøpte seg husvære på Fosse for om lag tolv år sidan. For snart tre år sidan flytta dei like godt inn for godt, ikkje lenge etter at sjøsportssenteret vart opna ved marinaen. Dimed vart det ikkje mindre padling på paret, særleg ikkje etter at dei fann ein god padleven i Siv Øygard.

Sjølve er dei ute tidt og ofte. Padlegruppa i regi av idrettslaget er i aktivitet i snitt kanskje ein gong i veka om sommaren.

– Dette vert ein kosetur. Når me er ute og padlar åleine, er det treningstur, seier Ekanger og ler.

Laurdag gjekk startskotet for friluftslivets år, som 2025 er peika ut til å vera. Dette markerte sjøsportsgruppa med padleturen til Linga. Og sidan temaet for avsparket var «Hele Norge båler», så laut vel også padlarane «båla». Dei hadde med seg ved og tende pliktskuldig eit bål og grilla pølser.

Stadig på tur

Padlegruppa arrangerer «sundagspadling» i nærområdet i sommarhalvåret, men reiser også på større utflukter. Gruppa har, for å nemna noko, padla rundt Varaldsøy, vel å merka med overnatting i medfylgjande seglbåtar. I tillegg har gruppa vore på tur til dømes på Skogseidvatnet, på vatn ved Folgefonna og i kanalane som går under og mellom Ikea og fleire kjøpesenter i Åsane, og dessutan på såkalla slusepadling. SjøAktiv har samarbeidd med Nordhordland Turlag om fleire turar, fortel Ekanger.

God tryggleik er det aller viktigaste i padling, understrekar ho. Difor må alle som er med på dei organiserte turane om vinteren, ha såkalla våttkort. Det sikrar deltakarane den grunnleggjande tryggleikskunnskapen som skal til for å ferdast trygt, mellom anna om korleis ein utfører såkalla kameratredning. Eit anna viktig tilskot til trygg ferdsle er tørrdrakter, som idrettslaget nyleg har investert i.

SjøAktiv arrangerer jamleg kurset som krevst for å få sertifiseringa. Og dei som har kurset og i tillegg er medlem i idrettslaget, får låna alt utstyr gratis.

Trass dei gode vilkåra for padlarar i Strandebarm skulle Ekanger gjerne hatt med fleire. På sundagspadlinga deltek for det meste ein stad mellom tre og sju padlarar. Ekanger fortel at sjøsportsgruppa har bestemt seg for å prøva seg med eit nytt rekrutteringstiltak i form av ungdomspadling for dei kring 12–16 år.

Her ser du kvar Larsaholmen ligg:

Tilbodet startar onsdag 5. mars. Bortsett frå ullklede, vottar og hue treng ikkje ungdomane ta med seg noko. Også dei som aldri har padla før, kan vera med og prøva.