På topp – igjen!

Hardanger Sykkelklubb stod bak arrangementet. På ein ny, men ikkje heilt ferdigstilt bane arrangerte klubben både NM og to rundar i noregscupen i grått vêr.

Ulltang konkurrerte saman med om lag tjue andre om å få seg sjølv og sykkelen over hinder og utfordringar. At han – som både er trenar for dei fleste deltakarane og som står bak sjølve arrangementet – vann, var ikkje overraskande.

– Er det for lett?

– Eg har vunne alle ritt i Noreg sidan 2015 eller 2016. Og eg lagar seksjonane – det blir jo ein slags fordel, men ingen andre vil gjera jobben. Så vinn eg med om lag dobbelt så mange poeng som andreplassen. Så det kan ikkje berre vera fordelen som gjer det, seier noregsmeisteren.

NM-sølvet gjekk til Knut Fosse, som også vart nummer to samanlagt i noregscupen. Det var kjekt å klara, synest han. Det gjekk mykje betre enn venta, fortel Fosse, som ikkje hadde trena så mykje på førehand.

– Nøgd

Trialmiljøet er ikkje stort, og arrangementet var av den enkle typen: ei brakke til sekretariatet, ein høgtalar med musikk og Leca-stein som podium. Det vart brukt små ressursar, fortel Ulltang, og det er han nøgd med. Det vart eit bra ritt, synest arrangøren.

Av 20 deltakarar var 14 av dei frå den lokale sykkelklubben. Jon Helgheim Sandven (7) frå Norheimsund var ein av dei. Sandven sykla på både eitt og to hjul i klassen for rekruttar.

Han har vore med på konkurranseritt ein gong før, fortel han. Laurdag hadde sjuåringen tre rundar gjennom løypa og dei ulike seksjonane. Alt i alt var han nøgd.

Det er litt vanskelegare når det er regn, fortel han. Og hinderet som vart kalla «fem blå», var det vanskelegaste.

Frå show til show

Sigrane til Ulltang kom etter ei mildt sagt travel veke. Kvemmingen hadde saman med makker Joachim Skjævestad heile ni sykkelshow veka før. Onsdag, torsdag og fredag hadde syklistane to show om dagen.

Onsdag var dei mellom anna på Os. Også der var det skikkeleg ruskevêr. To av dei få som stilte opp for å sjå på, vart like gjerne med i både NM og noregscupen.

– Eg trur det er vårt fyrste handfaste bevis på at me har rekruttert nokon til sporten etter 12–13 år med show, ler Ulltang.

Ulltang har også konkurrert i utlandet i år, mellom anna i verdscupen. Der enda han på 21.-plass. Det var hans fyrste løp på lenge, og vert sett på som «greitt» i eigne auge. I 2016 enda han på 14.-plass.

Noko for tilreisande?

Arrangementet på Haugamyr skulle etter planen gå av stabelen i juni i år. På grunn av ombygging av trialarenaen vart det flytta til september. Området har vorte større, og det er på plass nye hinder og fleire seksjonar. Det er gjort dugnadsarbeid av foreldre på nesten kvar trening, fortel Ulltang.

– Alt er ikkje heilt på plass, men me har kome godt på veg.

Også Fosse er nøgd med «oppussinga» og tykkjer det har vorte skikkeleg bra. Banen har mange nye hinder for alle nivå, fortel han.

Vona er at det kan generera tilreisande syklistar. Det har allereie vore eit par frå utlandet for å testa banen.