Øystese–Stord: Bøygde seg i støvet for matchvinnaren
Det vart spanande på slutten, men jubelen braut laus då dommaren bles i fløyta for siste gong.
Stord reduserte med få minutt att å spela av kampen, og dermed vart det ein lettare kaotisk innspurt av oppgjeret på Norheimsund stadion. Gjestene sende endåtil målvakta i åtak på eit frispark på tampen, men kom ikkje til store utlikningsmogelegheiter.
Øystese tok føringa tidleg i det viktige botnoppgjeret i 3. divisjon. Fabian Bødtker stod bak målet, etter pasning frå Preben Skorpen. Stord arbeidde seg inn i kampen i den fyrste omgangen, og rett etter pausen fekk stordabuane straffespark. Ballen hamna utanfor målet. Etter kvart tok Øystese meir over igjen, og Fabian Bødtker slo inn det som vart spikaren i kista etter ein flott soloprestasjon.
Både Øystese og Stord hadde 10 poeng før kampen, så kvemmingane passerer laget etter sigeren. Avstanden opp til laga over kjem an på resultatet i kampen Brann 2–Sogndal 2, som starta ein time etter kampen i Norheimsund. Til helga ventar ein ny «sekspoengskamp» for Øystese, når laget reiser til Førde.
