Øystese berga plassen i 4. divisjon

– Det er veldig positivt for samarbeidet at me får behalda plassen. Me har satsa på eit lokalt lag i år, og dei unge gutane som har stilt trufast på kvar trening sidan 1. januar, fortener merksemd, seier trenar Christian Kjosås.

Også laurdag var fotballaget ungt, sjølv om Johannes Jordal gjorde comeback i Øystese-drakta. Motstanden frå topplaget Voss vart tøff, og Øystese tapa til sist 1–5.

– Stolt trenar

Kjosås seier laget hang godt med i den fyrste halvdelen av 1. omgang, og endåtil fekk eit mål annullert, før Voss skåra to mål før pause. Endå eit kom på straffespark like etter kvila, før Johannes Røyrvik reduserte og Øystese i ein periode lukkast med å pressa heimelaget. To kontringsmål mot slutten tok lufta or kvemmingane. Sebastien Kyemo vart utvist i overtida.

Ettersom Flaktveit slo Os 2 4–2 i dag, slapp Øystese å gå den tunge vegen ned i 5. divisjon. Laget sanka 1 poeng meir enn osingane.

– Det var kjekt å vera med på dette, og det er ein stolt hovudtrenar som sit her, seier Kjosås, som reiste for å eta pizza med lagkameratane etter oppgjeret.

Han konstaterer at Øystese for det meste har slege laga rundt seg på tabellen, og meiner slik sett at det er vel fortent at laget berga plassen. Den største utfordringa i år har vore talet på spelarar på trening. Med komplett tropp i fleire kampar kunne poenga vore fleire, meiner Kjosås. I haust har laget jobba for å få meir struktur og sleppa inn færre mål, og har tidvis lukkast med det.

– Rar kjensle

Anders Botnen, ein av dei unge spelarane på laget, seier det for ein gongs skuld var kjekt å tapa.

– Det var ei rar kjensle å vera glad sjølv om me hadde tapa. Me visste det ville verta tøfta å hamla opp med Voss, men me var ikkje så langt frå som resultatet kanskje tilseier, seier Botnen.

– Korleis gjekk de inn i denne kampen?

– Innstillinga var at me skulle gjera så godt me kunne, same kor vanskeleg det var, seier han.

Botnen trur det er veldig viktig for starten på samarbeidet med Norheimsund sat laget ikkje ramla eit hakk ned i divisjonssystemet.

– Eg trur me får eit godt lag som kan kjempa i 4. divisjon. Eg gler meg! seier Botnen.

Ser framover

Kjosås veit ikkje kven som skal trena samarbeidslaget neste sesong, men ser lyst på framtida. Laga har mange lokale, unge spelarar å ta av, og mange av dei har no fått eitt års røynsle frå 4. divisjon.

– Dei unge gutane har fått god erfaring, og dei har utvikla seg individuelt og som lag, seier Kjosås, som sjølv spela midtstoppar mot Voss.

Han gler seg over at ein god gjeng Øystese-supporterar tok turen i buss til Voss for å støtta laget.

– Me høyrde godt André Laupsa på tribunen. Dei fortener litt ekstra skryt, seier Kjosås.

Trass sigeren rykte ikkje Voss opp. Det gjorde Gneist, som vann mot Tertnes laurdag.

I 5. divisjon fall Norheimsund, som fredag kveld tapa 2–6 for BI Bergen, til 8.-plass etter at både Olsvik og Løv-Ham vann laurdag. Odda/Tyssedal rykte opp etter å ha slege Juristforeningen 1–0 på bortebane. Det same gjer Trio i Kvinnherad.

I ein tidlegare versjon av artikkelen vart Terje Rosseland plassert på tribunen. Der var han ikkje. Red.