Overraska med storsiger: – Nesten eit heilt nytt lag

Sotra 2, som låg på ein 9.-plass før kampen og vann 5–0 førre gong laga møttest, møtte bokstaveleg tala eit nytt lag på Øystese idrettsplass.

Øystese/Norheimsund vann 6–1 over strilane.

Sjå biletserie frå kampen nedst i saka.

Dommaren såg raudt

Det fyrste målet til Øystese/Norheimsund kom frå Samuel Skåre eit kvarter ut i kampen. 3 minutt seinare klinka han til med nok ei skåring.

Like før pause kom Øystese/Norheimsund-spelar Anders Botnen aleine mot keeper. Akkurat kva som hende, fekk ikkje bladfyken med seg, men dommar Bjørn Tore Warland Idsø var kjapt oppe med både fløyte og raudt kort, og sende målvakta til Sotra 2 i garderoben.

Andre omgang starta med andre ord med 10 mann på motstandaren sitt lag og rikeleg med sjølvtillit hjå heimelaget.

Rann inn mål

Den fyrste målsjansen i andre omgang gjekk til bortelaget, men Sotra 2 lukkast ikkje i å få ballen i nettet. Det gjorde derimot Anders Botnen etter 49 minutt, og gav heimelaget det 3. målet for dagen.

Etter vel 70 minutt byrja det å merkast at det var lenge sidan førre kamp for spelarane til Øystese/Norheimsund. Krampane vart fleire og kom oftare, men stoppa ikkje spelarane. Nokre bytte og gode pausar på sidelina gav resultat.

Øyvind Berge sette inn 4–0-målet etter 72 minutt, og sidan rann det inn 2 til dei neste 10 minutta. Fyrst skåra Rune Øvsthus Kolltveit, og så skåra Anders Botnen sitt 2. mål i kampen.

Etter nær 90 minutt fekk bortelaget dagens einaste mål, som ifylgje fotball.no var eit sjølvmål.

Kampen for tilværet

«Hausten vert ein kamp for å overleve i divisjonen», skreiv Øystese fotball på nettsidene sine dagar før haustsesongen tok til. Påstanden hadde bakgrunn i manglande resultat, og at heile 11 spelarar forlét laget før og i løpet av sommaren. Fleire av spelarane har vore elevar ved Framnes Kristne Vidaregåande Skule, og var ferdige på skulen før sesongen var over.

– Det er nesten eit heilt nytt lag, fortel trenar Denis Ljubovic.

Mangelen på spelarar resulterte i at laget ikkje møtte til den siste kampen før ferien, og såleis gav frå seg 3 poeng. Laget var heller ikkje klart til det som skulle vera den fyrste kampen i haustsesongen 12. august, men motstandarlaget gjekk med på å flytta kampen.

Med det, og laget sin førre kamp mot Sotra 2, i bakhovudet kom 6–1-sigeren litt ut av det blå.

– Vart du overraska?

– Ja, litt, seier Ljubovic, som sjølv måtte trø til på grasmatta sundag.

– Nøla ikkje

Rune Øvsthus Kolltveit, Sondre Solberg, Øyvind Aarhus Engesæth og Eivind Madsen Skeie var blant dei nye ansikta i troppen. Sistnemnde, som har spela for og trena B-laget den siste tida, starta kampen som kaptein.

At han vart med i startellevaren, kom litt overraskande på han. Spørsmålet om å byta lag kom i sommar, og Skeie nølte ikkje med å seia ja.

– Eg har vurdert det tidlegare, fortel han.

– Korleis er forma?

– Stigande.

Oppvarminga til kampen var nemleg ikkje den beste. Laurdagen gjekk med til å spela bedriftscup i Øystese, og laget hans gjekk til finalen. Spelinga heldt med andre ord på heile dagen, og då laget vann cupen, måtte det sjølvsagt feirast. Slikt tek på.

Meir erfaring

Trenar Ljubovic er imponert over det nye laget. Etter 3 treningar saman og siger sundag ser han lyst på haustsesongen.

– Kva rolle spelar dette resultatet for laget?

– Det er veldig viktig. Å vinna den fyrste kampen 6–1 betyr mykje både for motivasjonen og for stemninga i laget. Det er eit veldig godt resultat, slår Ljubovic fast.

– Alle var så gode. Og dei nyaste var truleg dei beste. Det er veldig bra.

Det merkast at det var litt meir erfaring i laget som stilte til start, synest trenaren. Planen er å byggja opp med fleire lokale spelarar.

Nest sist

Til saman har samarbeidslaget vunne 2 kampar, tapa 7 kampar og spela uavgjort 3 gonger. Etter 12 kampar og med 9 poeng ligg Øystese/Norheimsund på nest siste plass på tabellen. Øvst ligg Askøy med 35 poeng på 13 kampar.

Førre siger kom mot Radøy i slutten av april. Nettopp Radøy er neste lag som skal måla krefter mot kvemmingane. Laget ligg på 8.-plass.

Neste heimekamp er sundag 3. september mot NHHI.

Sjå fleire bilete frå kampen her: