Over fjorden på cup
Ti skiskyttarar frå Kvam Langrenn- og Skiskyttarklubb pendla over fjorden og til Odda denne helga.
Der arrangerte Odda Idrettslag New Boliden – Green Zinc Cup ved Lontjørn laurdag og sundag.
HF trefte nokre kvemmingar på ferja mellom Jondal og Tørvikbygd laurdag ettermiddag. Ronja Måkestad, Maylinn Hellene Fonneland, Kaja Høen Mo og Jørgen Måkestad var alle stort sett nøgde med dagen. Fonneland var litt uheldig med skytinga, fortalde ho, men som ho sa: «Ny sjanse i morgon!»
Kring tjue born og unge er med på skiskyttartreningane, fortel Odin Fonneland, som er med som forelder. På renn brukar det å vera med ti–femten personar frå den lokale klubben. Denne helga var ti namn på lista.
– Me er ein av dei største klubbane som stiller, seier Fonneland.
– De prioriterer ikkje Torefjellsrennet?
– Skiskyting overgår langrenn, konstaterer Frode Måkestad.
Men komande helg er det Sjusete som står på planen. Då går det siste rennet for sesongen av stabelen på heimebane.
Med til Lomtjørn var Asbjørn og Sigrid Norheim, Maylinn Hellene Fonneland, Isabella Rose Burgess Opheim, Synneva Laupsa Mo, Perle Nygård og Ronja og Jørgen Måkestad.
Sundag vann Ronja Måkestad klassen for 13-åringar.
