Opnar skisenteret 2. juledag

Ifylgje ei pressemelding frå skisenteret reknar ein med å opna fire trekk og ei ny barneløype på sesongens fyrste opningsdag.

Medan det kom ein del snø i låglandet sist veke, fall det ikkje like mykje på Kvamskogen. Det som bergar opninga, er kunstsnø frå kuldeperioden og eit snøfall på kring 15 centimeter tung nysnø onsdag og torsdag.

– Det er lenge sidan me har hatt så fine forhold i jula, skriv Eikedalen Skisenter.

Også Furedalen Alpin vonar å opna i romjula, men det er fredag framleis uvisst når det kan skje. Lagra kunstsnø må flyttast til rett stad fyrst.

– Me jobbar for snarast mogeleg opning, opplyser skisenteret.