Nytt stortap for A-laget

Gjestene frå Bergen vann kampen, som vart spela laurdag, 6–1. Sigurd Stevnebø Kaale skåra målet til Øystese/Norheimsund då han utlikna til 1–1 i 1. omgang. Kvemmingane fekk Øystein Lammedal utvist etter 57 minutt.

Det er 2 kampar att å spela, og Øystese/Norheimsund har 5 poeng opp til den siste plassen over nedrykksstreken.

Kor mange lag som rykkjer ned frå 3. divisjon, påverkar kor mange lag som rykkjer ned frå 4. divisjon. Ifølgje Rune Øvsthus Kolltveit, som er spelar på Øystese/Norheimsund og styremedlem i Øystese Fotballklubb, ser det ut til at fleire enn dei 2 nedste laga i avdelinga kjem til å rykkja ned i år. Såleis vil truleg ikkje det å kara seg opp til plassen over nedrykksstreken vera godt nok.

Neste kamp er på bortebane mot Voss laurdag 14. oktober.

B-laget Norheimsund/Øystese i 5. divisjon tapte 1–5 for Austrheim på bortebane laurdag. Laget rykkjer ned. Komande helg kjem Tertnes 2 på vitjing.