Nytt maskineri og utvida lokale

Bakgrunnen for feiringa var hovudsakleg at nytt eit nytt bowlingmaskineri er på plass i hallen, noko som vil letta arbeidet til dugnadsgjengen betrakteleg. I tillegg feira dugnadsgjengen utvida lokale og at det i år er 20 år sidan Kvam fekk eigen bowlinghall.

Om lag tjue personar sat rundt bordet då styremedlem Lars Endre Tholo ynskte velkomen. Han hadde fått i oppgåve å fortelja litt om historia.

– Eg fekk denne jobben fordi eg har færrast dugnadstimar. Men eg synest det er ærefullt å få lov til å setja pris på denne gjengen som har bidrege. Og det er ikkje så reint lite! opna han med.

– Rom for alle

Det var Njål Skulstad som starta arbeidet med å etablera bowlinghall i 2004. Ifylgje Tholo heldt Skulstad på både seint og tidleg i seks år. Då fann han ut at det var litt mykje å halda på med. Anlegget var frå slutten av 1950-talet, og det var mildt sagt mykje arbeid berre å halda det i sving. Tholo fortalde at Skulstad var – og er – ein ekspert på anlegget, og at han endåtil har sett seg inn i alt med den nye maskina.

Då Skulstad gav seg i 2010, valde aktive bowlarar å starta Kvam Bowlingklubb. Sidan har klubben vorte driven på dugnad, velvilje og gode støttespelarar.

Tholo sa at aktivitetstilbodet er eit samarbeid som går på tvers av heile kommunen. Det er det som gjer det så utruleg meiningsfylt å vera med på, meiner han. Bowling treffer mange ulike brukargrupper. Også dei med redusert funksjonsevne kan vera i hallen og ha det kjekt. Det var noko av det fyrste han la merke til i klubben.

– Her er det rom for alle. Det er viktig i eit samfunn, sa Tholo.

Ein ny æra?

Ordførar i Kvam, Torgeir Næss, var til stades for å opna den nye bana. I talen sin takka han klubben for ein heilt spesiell innsats og vilje til å stå på for at Kvam får halda på tilbodet.

– I dag markerer me kanskje starten på ein æra der endå fleire kan få sansen for denne artige sporten, sa han.

Næss nemnde òg at ei synfaring i det gamle maskineriet minte han om ei blanding av ein skurtreskar og maskinene til professor Balthazar.

– Det kravde sterk teknisk innsikt og ikkje minst forsiktigheit.

Sidan 2010 har medlemstalet auka, og no ligg klubben på om lag førti medlemer. Halvparten av dei er aktive seniorar som brukar mykje tid ved bowlingbana. I tillegg til månadsturneringar har klubben eitt lag i 1. divisjon og eitt lag i 2. divisjon.

Også folk som ikkje er medlemer, er innom. Mest populært er barnebursdagar. Det er gull verdt for klubben. Borna får ei god oppleving og kjem attende med eigen familie. Det skapar mykje aktivitet, sa Tholo.