Nytt bowlingmaskineri til Øystese

Dei noverande maskinene har vore i bruk sidan 60-talet, og har sett sine beste dagar. Det fortel leiar i Kvam Bowlingklubb, Terje Høysæther. I haust fekk klubben tilbod om å kjøpa maskiner frå ein bowlingbane i Farsund. Dei var sjeldan i bruk og måtte difor fjernast før jul.

– Me fekk ein knallgod pris. Det var verkeleg eit røvarkjøp! seier Høysæther.

Klubben fekk økonomisk stønad frå Kvam herad, Sparebanken Vest og ulike bedrifter. Bowlingmaskinene skal lagrast på Kleppe Møbelfabrikk fram til mai, då dei skal monterast. Høysæther er takksam for at dei får låna lokala til fabrikken. Der er det både tørt og varmt, slik at maskinmotorane ikkje vert øydelagde.

Høysæther gler seg til å oppgradera bowlinghallen.

– Det vert stor forskjell! Dei nye maskinene lagar mindre støy og har mykje lågare vedlikehaldsutgifter, fortel Høysæther.

Fleire kan bidra

Ein annan fordel er at maskinene kan styrast med knappar og kontrollpanel. Ein slepp å justera delane manuelt. Dermed kan fleire bidra til å halda anlegget i gang. Kvam Bowlingklubb vert driven gjennom dugnadsarbeid. Målet er å skapa leik, moro og ein sosial møteplass.

– Bowling er god mosjon. Ein rører på heile kroppen. Men det sosiale aspektet er viktigast. Me har eit bra bowlingmiljø, fortel Høysæther.

Ifølgje han er til dømes grupper med seniorar, ungdomar og personar med nedsett funksjonsevne innom og spelar fast. Neste år håpar Høysæther spesielt å satsa meir på ungdomar.

– Me ynskjer å ta vare på alle i lokalsamfunnet. Det er gjevande for heile klubben, seier han.

Godt skodd

John Roger Tveiterås frå Kvam Maskin og Transport var sjåføren som fekk i oppdrag å frakta bowlingmaskinene frå Sørlandet til Øystese.

– Det var veldig kjekt at han kunne hjelpa oss på berre to dagars varsel, seier Høysæther.

Køyreturen starta med fint føre, men sluttetappen baud på nådelaust snøvêr. Kona til Tveiterås måtte stå i vegen og stoppa bilar då han skulle svinga inn til Kleppe Møbelfabrikk. Heldigvis gjekk turen utan problem.

– Me skodde oss med gode kjettingar, så det gjekk bra, seier sjåføren.