Nye rekordar i Vikøy

Kring 70 personar samla seg rundt bålpanne og bane då Hardanger Skøyteklubb inviterte til tevling på rulleskøytebana i helga. Av dei 27 påmelde var halvparten lokale og halvparten tilreisande. Fana Idrettslag var mellom dei som tok turen.

Fekk skryt for bane

Tidlegare skøyteløpar Camilla Helene Hallås Farestveit skulle gjerne hatt ei liknande bane i Bergen. Farestveit har konkurrert både nasjonalt og internasjonalt, men gjekk i 2014 over i trenarrolla. I dag er ho hovudtrenar for seniorane i Fana. Ho tykkjer bana er fantastisk.

– Det er ikkje mange stader i Noreg som er tilrettelagde for rulleskøyter, seier Farestveit.

Klubben hennar trenar mykje meir på is enn på asfalt. I Hardanger Skøyteklubb er det omvendt. Ifylgje Silje Vikøy i Hardanger Skøyteklubb har dei lokale deltakarane heva nivået mykje sidan fjoråret.

– Det er ein hard kjerne som har utvikla seg veldig, seier ho.

Det viste seg også på bana.

Sjå fleire bilete frå rulleskøytebana her:

– Solid

Ifylgje skøyteveteran og trenar Brynjulf Måkestad vart det sett mange personlege rekordar på asfalten. Han er svært nøgd med arrangementet.

– Alle borna hadde gode forbetringar, seier Måkestad.

Nantawat Duangkaew er den som går mest solid, meiner han. Også Vikøy hadde stor tru på guten før løpet. Duangkaew går i klassen junior C, og sette ny personleg rekord på 500 meter. Tida vart 1.04,10 minutt.

Også Aleksander Bredesen er verd å merkja seg, meiner Måkestad. Bredesen gjekk 250 meter på 42,14 sekund, som ifylgje trenaren er svært sterkt av ein niåring.

Banerekorden til Måkestad på 250 meter vart slegen av Ivar Norheim frå Fana. Norheim rulla over målstreken etter berre 24,65 sekund.