Ny kunstgrasbane på Haugamyr
Nyvinninga til Norheimsund Fotballklubb er snart klar til bruk.
Norheimsund Fotballklubb fekk i vår løyve til å byggja ny kunstgrasbane. Arbeidet starta i mai. GBS Entreprenør AS utførte grunnarbeidet. Planen var å ferdigstilla kunstgrasbana til fellesferien byrja, men dårleg vêr gjorde at det vart utsett til august, fortel banemeister Sverre Aksnes på vegner av klubben.
Laurdag starta arbeidet med kunstgraset. Det innleigde firmaet Sport Surface AS la kunstgras, merkte opp bana og strødde ut miljøvenleg fyllmasse, som består av kork og kokos. Når fyllmassen har tørka, skal den jamnast ut.
Bana vert 68 meter lang og 48 meter brei – ei niarbane. Det er òg merkt opp til sjuarbane. Mot kyrkja skal fotballklubben setja opp eit sikringsnett for å hindra at ballar forstyrrar trafikken og naboane. På langsidene vert det sett opp gjerde. Kortsida mot klubbhuset skal òg sikrast, men her avventar ein for å finna best mogleg løysing. Det er foreløpig sett opp gitter framføre vindaugo til klubbhuset.
Dei neste dagane vert det dugnadsarbeid for å setja opp mål, gjerde og sikringsnett. Om alt går etter planen, skal bana vera klar til helga. Tine Fotballskule tek bana i bruk frå måndag 12. august.
Auka banekapasitet har vore eit behov i lengre tid, fortel Sverre Aksnes. Bana skal fyrst og fremst nyttast av aldersbestemte lag til kampavvikling og treningar.
Aksnes skryter hemningslaust av alle dei involverte i arbeidet.
– GBS Entreprenør har gjort ein framifrå jobb med grunnarbeidet og arbeidd lange dagar for å få det ferdig. Sport Surface har gjennomført kunstgrasarbeid for fleire profilerte idrettsklubbar tidlegare og veit kva dei held på med. Styret i Norheimsund Fotballklubb har gjort ein særs grundig jobb i heile prosessen. Eldsjeler som Hogne Høysæter, Erlend Ellingsen og Odin Johan Fonneland har investert mykje tid i å driva dette fram. Sponsorar har gjeve viktige økonomiske bidrag. Folk i bygda stiller velvillig opp for å bidra. Dugnadsånda i og rundt klubben er særs god, seier Aksnes.
Norheimsund Fotballklubb fekk i mai løyve av Kvam herad til å byggja tur-og trimløype på Haugamyr. H2 Hardanger AS er ansvarleg søkjar. Løypa skal gå rundt fotballbana og i området ved Orrehaugen. Ho skal vera kring éin kilometer lang. GBS Entreprenør skal utføra arbeidet i haust, opplyser pådrivar Hogne Høysæter på vegner av Norheimsund Fotballklubb.
