Nøgde med snøtilhøva trass treg start

Desember og januar baud på ein litt treg start. Så vart det bra i februar, mars og april. Både vinterferien og påskeferien var bra. Då var mykje gjort, seier Tønjum.

– Det var mange fine dagar, kveldar og helgar, så me er godt nøgde med sesongen, seier han.

– Sjeldant gode tilhøve

Fine tal

Han anslår at det var mellom 60.000 og 70.000 gjester i løpet av sesongen. Det høgaste talet gjester på éin dag, som kom torsdag i vinterferien, var kring 2.500.

Det var 83 dagar med drift denne sesongen, mot 77 i fjor. I 2020 var anlegget ikkje i drift, som fylgje av pandemien. I fjor enda det rimeleg bra, og i år litt betre.

– Det me merkar spesielt i år, er straumprisane. Dei er minst firedobla i høve til tidlegare. Diesel, som me brukar mykje av, er òg monaleg dyrare. Det vil få ein økonomisk innverknad i år, seier Tønjum.

Økonomien er likevel grei.

– Me klarar oss, seier han.

Har 5,7 kilometer med heisar

Den nye skiheisen, Toppheisen, har fungert bra og har vore i drift mange dagar.

Anlegget har åtte heisar. Dei fleste som står på ski i Eikedalen, kjem frå Bergen, Samnanger og Kvam. Innimellom er det turistar frå andre stader.

Det har skjedd nokre mindre uhell denne vinteren, men ingen ulukker. Når det er lite snø og isete og kupert terreng, er det monaleg fleire uhell. Men i påsken var det så å seia ingenting, seier Tønjum.

Har proff skipatrulje

Senteret samarbeider med Raudekrossen, men har også eigen skipatrulje med ambulansesjåførar frå Bergen. Patruljen er på vakt heile tida.

– Er det folk som køyrer for fort?

– Det er det sjølvsagt alltid. Her, som andre stader, er det mykje uvitug køyring. Det kan skuldast at ein køyrer for fort eller ikkje har ferdigheitene som skal til.

Senteret sysselset kring 50 personar inkludert deltidstilsette.

– Konkurrerer de med Furedalen Alpin?

– Me samarbeider med dei. Me har litt forskjellige målgrupper. Litt konkurranse er det alltid, men eg kan ikkje seia at me knivar med kvarandre.

– Det har vore ein fin sesong, utan alvorlege hendingar. Me har inntrykk av at folk er nøgde, samanfattar Tønjum.