No kan du gå rundt Haugamyr

I 2022 søkte Norheimsund Fotballklubb om kommunal stønad til å utvikla idrettsanlegget på Haugamyr. No er turløypa ferdig.

Løypa er lagd rundt ytterkanten og har snarvegar mellom dei ulike delane av området. I austre del er løypa relativt flat, medan ho har større høgdeskilnadar rundt fotballbanen i nordvest. Kostnaden på 700.874 kroner er dekt mellom anna med 300.000 kroner i spelemidlar for 2023 frå Vestland fylkeskommune.

I søknaden til heradet skreiv klubben at det har vore arbeidd for utvikling av anlegget sidan slutten av 1990-talet. Planane som er teikna av Cowi AS i 1999, og deretter Asplan Viak AS i 2021, viser korleis ulike aktivitetar og idrettar kan skapa ein møteplass på Haugamyr.

Klubben ville, ifylgje søknaden, prioritera ny fotballbane for 7-arfotball og turløype rundt heile området. I januar 2023 inngjekk klubben og heradet ein avtale om drift av joggeløypa i ti år.

– Auka kapasitet

Fotballbanen var ferdig i august i fjor. Medan GBS Entreprenør AS gjorde trimløypa ferdig i november. Det einaste som står att, er å setja opp eit gjerde mot naboen, seier Odin Johan Fonneland, styremedlem i Norheimsund Fotballklubb.

– Me har lenge hatt for liten banekapasitet til både treningar og kampar. Målet med dei to prosjekta var å auka kapasiteten og få fleire til å nytta anlegget, seier Fonneland.

Han har saman med Hogne Høysæter vore primus motor i prosjektet. Mykje av arbeidet med trimløypa er gjort på dugnad, mellom anna planlegging, tilrettelegging og rydding av skog. Gjerdet skal også setjast opp av frivillige. Delar av området er jamna ut, sådd i og pynta. Det er blitt finare, seier Fonneland.

Fylgjer terrenget

Løypa på om lag 800 meter går rundt begge fotballbanane og forbi klubbhuset. Høysæter seier at det er vegen rundt den store banen som er lettast å sjå. Den andre delen ligg langs den nye banen, og langs det som tidlegare var den gamle oppløpssida på 100-meteren. Løypa fylgjer terrenget for å gjera minst mogleg inngrep.

– Om vinteren er det ikkje råd å sjå at løypa er der, og det er poenget, men me må nok merkja henne til sommaren, seier Høysæter.

Han fortel at grusvegen har trippel breidde ved klubbhuset.

– Der kan ein springa 60-meteren på ein god måte, seier Høysæter.

Joggeløypa passar godt til oppvarming på fotballtreningar, men løypa er alltid tilgjengeleg for alle, ifylgje Fonnaland. Det er berre fint å sjå at folk går tur i løypa samstundes som det er organisert trening, seier han. Høysæter seier at det er mogleg å tilpassa løypa til ulike aldersgrupper ved å velja ulike ruter, samstundes som det er ein veg mellom dei ulike banane og områda. Han vonar fleire vil ta området i bruk, også når det ikkje er organisert aktivitet. På sikt er målet at det skal verta fleire område med aktivitetar, leik og moro, seier han.

– Kjempesuksess

I haust tok fotballklubben i bruk den nybygde kunstgrasbanen for 7-arfotball på Haugamyr. Han har allereie blitt ein kjempesuksess, seier Fonneland. Det skal setjast opp eit fem meter høgt ballnett mot klubbhuset, tilsvarande det som er mot kyrkja, for å unngå knuste vindauge. Klubben har kjøpt inn gjerde til begge sider av den nye banen, slik at ballane ikkje skal trilla så langt vekk. Sidegjerda skal vera éin meter høge og skal setjast opp så fort vêret tillèt det, ifylgje Fonneland.

– Banen er fast i bruk til trening. Han manglar lys, og me kunne difor ikkje nytta han så lenge me ynskte. Me har innsett at det ikkje er så mange månadar i året me kan bruka banen utan lys, seier han.

Det neste prosjektet på Haugamyr vert difor truleg å få lys på den nye banen òg, men ingen planar er lagde endå. Ifylgje Fonnaland har den store fotballbanen både lys og vinterbrøyting. Dei eldste brukar banen nesten heile vinteren, så lenge det er vêr til det, seier han.