– No er det berre å henta fram skia
Allereie sundag kveld vart lysløypa på Sjusete klar til å ta imot dei første løparane.
– Den fem kilometer lange lysløypa har fått klassiske spor og skøytetrasé. Sjølv om det ikkje kom mykje snø, tykkjer eg kvaliteten er ganske bra, seier Asgaut Valland, som har ansvaret for løypekøyringa på Sjusete.
Kjosås-løypa var ikkje klar då HF snakka med han måndag.
– Den har ikkje like godt underlag som lysløypa, og treng meir snø. Det kan henda eg prøver trakkemaskina i kveld, så får me sjå korleis det går, seier han.
Så lenge det er kaldt, trur Valland lysløypa vil halda seg.
– Men får me mildvêr og regn, vert løypene fort øydelagde, seier han.
Kanskje i Jondal
Sveinung Selsvik er løypeansvarleg for turskiløypa til Jondal Idrettslag. Måndag føremiddag hadde han ikkje sjekka forholda.
– Eg trur det er litt lite snø. Kanskje kan me laga ei kort løype frå startpunktet i Djupadal til Vassenden. Den strekninga er på grusveg, og då trengst det mindre snø. Det hadde vore veldig kjekt å få til litt løype, slik at dei mest ivrige kan kjenna korleis det er å ha ski på føtene, seier han.
Jondal Idrettslag har også ei lysløype på Storemyr. Denne har Svein Olav Espeland ansvaret for.
– Me har ikkje byrja trakka. Det er litt for lite snø, og eg vil ikkje risikera å øydeleggja maskina, seier han.
Leiar i skigruppa til Strandebarm Idrettslag, Torunn Lutro, fortel at grunneigaren rapporterer om fint skiføre på Åse på Omastrand. Løypene var ikkje preparerte måndag føremiddag. I Haukås i Strandebarm er det også skiføre på vegen, men ikkje i terrenget. Her er var det heller ikkje preparert måndag.
– Truleg klart til helga
Jan Guttorm Skeie er dagleg leiar i Kvamskogen Hytteservice AS, verksemda som preparerer skiløypene på Kvamskogen.
– Me skal prøva løypemaskina i løpet av veka. Løypene som går på grusveg, skal kunna verta brukbare til helga. Det er nok for lite snø for løypene som går i terrenget, seier han.
Skeie er også dagleg leiar i Kvam Fjellheiser AS, verksemda som driv Furedalen Alpin. Han fortel at dei som helst vil bruka alpinski, må venta litt.
– Det kom 30 til 40 centimeter med tørr nysnø i helga. I dag starta me snøkanonane. Om alt går vår veg, trur eg me kan opna skisenteret i midten av desember, seier han.
Heller ikkje Eikedalen Skisenter AS har nok snø til å opna anlegget. Også der er snøproduksjonen i gang, fortel dagleg leiar Fredrik Tønjum.
– Dersom vêret spelar på lag med oss, vil me truleg opna dei første heisane laurdag 9. desember, seier han.
