NM-vinnar frå Steine
Kusk Bjørn Steine frå Steinsdalen vart laurdag noregsmeister i travløp for stalltilsette. – Det er nok det største eg har oppnådd, seier han.
Etter 3 løp på Bergen Travpark slo han ringreven Ivar Asphaug med to poeng samanlagt.
– NM-tittelen heng høgt, seier Steine til HF.
Rodde det i land
Han kvalifiserte seg for NM, som ein av 12 kuskar, gjennom gode prestasjonar i løp i fjor. NM omfattar 3 løp. Medan det vart 3.-plass med hesten Korappen i det fyrste, vann Steine det andre med G. Soten. Steine leia ikkje då oppløpet starta, men G. Soten sette opp farten såpass mykje at sigeren til sist vart enkel.
Etter to løp leia han med 32 poeng og hadde eit forsprang på 7 poeng til Ragnhild Bjørnbeth. Og sjølv om Asphaug vann det siste løpet, heldt det ikkje til å ta att kvemmingen i samandraget, ifylgje trav365.no.
Med 5 poeng i det siste løpet, der Steine førte hesten Donato Gilbak til 9.-plass, sikra han seg 37 poeng totalt og dimed sigeren framom Asphaug og Bjørnebeth.
Deltakarane i NM trekkjer ein såkalla A-hest, ein B-hest og ein C-hest, der A-hestane er dei beste. Steine fortel at han fekk ein god A-hest og brukbar B-hest, og slik sett hadde litt flaks med trekkinga. Det var med A-hesten han vann. Han seier han slett ikkje var trygg på sigeren samanlagt etter det siste løpet, der hesten gjekk tidleg trøytt og fekk ein lang veg til mål.
– Heldigvis heldt det, seier han.
Lange dagar
Steine er stalltilsett hjå travtrenar Åsbjørn Tengsareid på Granum gård i Sandefjord, som like godt vann NM for travtrenararar for femte gong tidlegare i år. Stallmannen trenar hestar og gjer førefallande stallarbeid, og er altså i tillegg kusk. Steine har med sigeren laurdag vunne 204 løp i karrieren, og var såleis deltakaren med flest sigrar. Noregsrekorden har elles legendariske Gunnar Eggen, som gav seg i 2008, med 5.546 sigrar.
Sjølv om han vinn rett som det, vert ikkje Steine rik av å vera kusk. Premiane varierer etter kva løp det er og etter plasseringa. Som kusk får han ein prosentdel av premiepengane frå travtrenarane som leiger han inn.
– Eg kunne sikkert tent meir, men eg trivst godt slik eg har det, seier han.
Nett kroner og øre er han uansett ikkje så oppteken av, sjølv om han vedgår at dei 30.000 kronene i premiepengar i NM kjem godt med. Viktigare for han er det å trivast med det han driv med.
Og det gjer han, forsikrar han, sjølv om det gjerne vert lange dagar som strekkjer seg frå tidleg morgon til seint på kveld. I samband med løpa vert det ein del reising med både bil og fly, sjølv om Sandefjord ligg nokså sentralt plassert med tanke på konkurransearenaer på Austlandet.
Tilbake til hestane
Steine er utdanna yrkessjåfør, men gjekk etter ein periode i Royal Transport AS over til ekte hestekrefter. Til alt hell fekk han med seg den tidlegare arbeidsgjevaren, med Ståle Dyngeland i spissen, som personleg sponsor. Dyngeland sponsa dessutan NM for fyrste gong i helga, så for han vart det ei spesiell helg.
Rett som det er fører Steine ein av hestane til faren Håkon i travløp. Oppveksten mellom hestar på garden på Steine har utvilsamt vore viktig for yrkesvalet, men nokon tvang har det aldri vore snakk om, forsikrar sonen.
– Faktisk datt eg litt av i ein periode og vart meir oppteken av lastebilar. Då eg slutta med fotball på ungdomsskulen, byrja eg trø i stallen att. Så kom eg i gang og fekk smaken på det, seier han.
Det kan gå lenge mellom kvar gong den nære familien, som var på plass i Bergen laurdag, ser noko til sonen og broren. Tida er knapp.
Ynskjer å studera
Knappare kan ho verta. Steine fortel at han har søkt om plass på travtrenarstudiet til Norsk Hestesenter på Østre Toten. Det skal lata seg kombinera med jobb, fortel han. Elles får han bra med kusktrening gjennom rolla som hestetrenar til dagleg.
– Ein utviklar seg veldig mykje i kvardagen. Det handlar om å prøva å få hesten til å fungera optimalt og disponera kreftene rett i løpa. Dess meir ein gjer noko, desse flinkare vert ein, uansett kva det er, seier den ferske noregsmeisteren.
