NM-medalje til to kvemmingar

Kvemming Hanna Børve slo like godt til med sølvmedalje i NM-sprinten i skiskyting for seniorar på Stiklestad fredag. På startstreken stod nokre av dei fremste stjerneskota.

Difor, og trass i at ho har merka stor framgang i løpet av sesongen, overraska ho seg sjølv litt med ei så god plassering.

– Det var litt over det eg forventa, sjølv om eg har sett at toppnivået mitt er bra, seier Børve.

Berre Maren Hjelmeset Kirkeeide frå Markane var betre – nærare bestemt 7 sekund – enn øystesejenta på den fyrste dagen av tevlinga i Blommen Skisenter.

Børve, som representerer både Kvam Langrenn- og Skiskyttarklubb (KLSK) og Team Havland, leverte 10 feilfrie skot, medan vinnaren bomma 1 gong. Karoline Erdal frå Førde tok 3.-plassen. 153 deltok.

– Gjev tryggleik

Etter å ha hatt trøbbel med ryggen i starten av sesongen, har det gått betre og betre for kvemmingen.

– Eg har ikkje gjort noko hokuspokus, men plutseleg fått betaling for innsatsen. Ein kan sjå på trening at ein har potensial, men det er noko med å få det til på dei største scenene. Det gjev ei bekrefting og ein tryggleik i det eg gjer, og er god motivasjon inn mot ein ny sesong, seier skiskyttaren.

Malin Auganæs Bergtun, også ho representant for KLSK, vart nummer 26 i sprinten etter å ha bomma 2 gonger. Andrea Sørheim Almeland og Hedda Høen Mo, frå Kvam LSK, vart høvesvis nummer 107 og 111.

Laurdag var det 12,5 kilometer fellesstart. Børve var igjen best av kvemmingane. Det vart 4 bomskot og 11.-plass. Bergtun bomma 3 gonger og kom i mål på 13.-plass. Maren Hjelmeset vann med 1 bomskot.

Sundag tok Børve og Bergtun bronse i stafetten. Med på Hordaland-laget var også Julie Tronerud Kvelvane. Trioen leverte feilfri skyting og kom i mål 20,5 sekund bak vinnarlaget frå Sogn og Fjordane.

Mykje merksemd

NM vart kringkasta på fjernsynet, så mange fekk med seg dei gode prestasjonane til kvemmingane. Børve måtte dessutan gjennom ymse tv-intervju etterpå. Ho seier at ho har fått mange tilbakemeldingar i ettertid. Så langt plagar ikkje merksemda henne; slikt tek ho som eit godt teikn på at det har gått godt.

Børve gler seg over støtta ho har fått frå moderklubben i heimheradet, og slår fast at det har lønt seg å halda ut og henga med for dei som har gjort det.

Etter NM slappar ho av med kjærasten i nokre dagar. Sidan reiser ho til Lillehammer for å sjå om det er meir snø å gå på, og gjera litt ymse anna attåt trening. Om ein månads tid er det tid for å rulla på ski.

I påsken vert Børve å treffa i Kvam. Pappa Geir har allereie åtvara henne om at ho truleg berre må håpa på å sleppa å bera randoneeskia lenger enn til Såta før ho tek dei på seg.