Nådde semifinalen i Odda
J13-jentene til Norheimsund/Øystese var berre eitt steg frå finalen i Zinkencup i Odda i helga.
Det var ein både litt nedstemt og litt våt gjeng med fotballjenter HF trefte på jondalsferja sundag ettermiddag.
Etter 0–3-tap for Etne i semifinalen var jentene litt skuffa, men trenarane Ole D. Ones og Erlend Ellingsen heldt ein trøystande og oppmuntrande ferjetale. Dei er veldig nøgde med innsatsen til jentene mot sterk motstand.
Dessutan, understreka dei på ferja, skal jentene vera litt skuffa og triste etter eit tap. Det er betre enn at dei tapar med likesæle, ifylgje trenarduoen.
– Erlend og eg diggar det! sa Ones.
Mellom anna understreka trenarane at jentene møtte fleire svært gode motstandarar, mellom desse semifinalemotstandar Etne. Likevel lukkast jentene med å halda laget til uavgjort i gruppespelet dagen før – og kunne like snart ha vunne. I gruppespelet elles vart det elles 0–4-tap for solide Solid og 5–1-siger mot Trio frå Husnes.
I kvartfinalen sundag slo jentene Nord SK 1–0, før dei altså møtte veggen i «semien» mot Etne. Etne vann til sist klassen, etter 1–0-siger mot Solid i finalen.
17 spelarar var i sving for laget dei to dagane. Nær sagt heile laget, minus målvakta, vart bytt ved pause i kvar kamp.
Ifylgje Hardanger Folkeblad vart G14-laget frå Jondal tildelt årets pris for fair play. Laget tapa kvartfinalen for Odda sundag.
