Muskelmann i legefrakk
Turnuslege ved Norheimsund legesenter, Jarle Bjørgo Onarheim (32), kan meir enn å nytta stetoskop. Han kan skilta med nasjonale og internasjonale topplasseringar i styrkeløft.
Onarheim vaks opp og bur i Bergen. Han jobbar som turnuslege ved Norheimsund legesenter. I mars byrjar han som fastlege i fast stilling i Kvam.
Turnuslegen fortel at han byrja med styrkeløft for åtte år sidan. Han har vore innom forskjellige idrettar i oppveksten, som fotball, taekwondo og kickboksing. I vaksen alder har han trena på treningssenter og gått i fjellet. Styrketreninga gav meirsmak og fekk han til å byrja med styrkeløft, fortel 32-åringen.
I byrjinga hadde ikkje Onarheim ambisjonar om å konkurrera, men då han vart med på klubbkonkurransane til klubben han er medlem i, Odin Styrkeløftklubb, vart gneisten tent. Han gjorde det godt. Han såg at han fekk gode plasseringar, og det vart kjekkare og kjekkare å konkurrera. Onarheim likte å ha eit føremål med treninga.
– Det kan verta keisamt å berre stå og løfta vekter. Då er det kjekt å ha ein konkurranse å sjå fram til, fortel Onarheim.
Var Noregs sterkaste
I styrkeløft er det mogleg å delta i ein eigen konkurranse i benkpress. Onarheim fortel at han har trena mest til desse konkurransane, kalla «benkpress utstyrsfritt».
Onarheim har konkurrert sidan 2017 og har delteke i klubbstemne, noregsmeisterskap (NM), europameisterskap (EM) og verdsmeisterskap (VM).
Han har fleire topplasseringar, har vunne fleire klubbstemne og vorte noregsmeister i benkpress utstyrsfritt tre gonger.
I 2022 deltok han i VM i benkpress utstyrsfritt i Almaty i Kasakhstan. Han skildrar konkurransen som eit av høgdepunkta i karrieren. Kasakhstan var eit spanande land å vera i. Dei beste utøvarane i sporten deltok, og det var tøff konkurranse om plasseringane.
I tredje og siste løft løfta han 210 kilo. Det var ny personleg rekord og resulterte i 5. plass.
– Eg trudde ikkje eg skulle få det til, men det gjekk likevel, fortel Onarheim.
Året etter deltok han i EM i benkpress utstyrsfritt i Merignac i Frankrike. Då løfta han 212,5 kilo. Det resulterte i ny personleg rekord og 4. plass. Det vart også ny noregsrekord i vektklassen under 93 kilo.
– Eg hadde rekorden inntil nyleg.
Fleire tunge løft
Onarheim har også løfta tungt i dei andre øvingane. Han har personleg rekord på 272,5 kilo i markløft og 242,5 kilo i knebøy.
Onarheim trur at han kan løfta enda meir. Han synest det er motiverande å oppleva framgang på trening. Framgangen tilseier at han kan bli endå betre. Han rår alle som vil byrja med styrkeløft, til å melda seg inn i ein styrkeløftklubb. Medlemmar i styrkeløftklubbar får tilrettelagde treningsprogram og god oppfølging, fortel Onarheim.
Muskelmannen fortel at styrkeløftmiljøet ikkje er det største, men fleire har vorte interessert i sporten dei siste åra. Han trur at det skuldast at folk er oppslukte i styrketrening og helse, seier turnuslegen.
Klar for revansje
Onarheim fortel at han konkurrerte lite i 2024. Då nytta ein av dei argaste konkurrentane hans, Kim Beck-Gundersen, høvet til å ta noregsrekorden i benkpress utstyrsfritt. Gundersen løfta 215 kilo.
Det gjev Onarheim motivasjon til å konkurrera meir i år.
– Eg lyt ta rekorden tilbake, fortel Onarheim.
Det får han sjansen til i slutten av februar. Då er det NM i benkpress utstyrsfritt i Haugesund. I mai er det VM i same øving. I år vert VM arrangert i Drammen. Onarheim fortel at han skal delta i begge konkurransane.
– Målet mitt er å bli noregsmeister, fortel muskelmannen.
