Moro med ballen i hallen
Laurdag arrangerte Rossvoll Volleyballklubb turnering for born frå 4. til 7. klasse i Øystesehallen.
Born frå heile gamle Hordaland var inviterte, og 36 lag dukka opp. Dette var den siste turneringa i sitt slag for sesongen.
Det fortel Eilev Nyland, dagleg leiar i Rossvoll Volleyballklubb. Han seier at dagen gjekk fint føre seg, og fortel om stor aktivitet og ei fin læringskurve for ulike lag.
Ein som truleg har hatt bratt stigning på læringskurva i det siste, er Marcus Vikør Bjørke. For han var det den fyrste volleyballturneringa nokosinne. 12-åringen byrja med sporten for eit halvt år sidan. Det same gjorde lagkameraten, Mathias Sandvik Tolo, og litt etterpå byrja Ola Haugsland Ur.
Trekløveret spela på same lag laurdag. Og sjølv om dei kan reknast som ferske i «faget», vann dei alle kampane.
– Eg tenkjer det er veldig bra, seier Bjørke.
Høgdepunktet for dagen var likevel treningskampen før turneringa byrja, synest han. Det var i den kampen dei fekk kjenna mest på motstand.
Alle laga spela fire eller fem kampar kvar. Hallen var delt i tre og hadde tre banar i kvar del. Resultata vart noterte, men det er ikkje fokus på resultat i turneringa, seier Nyland.
Rossvoll stilte sjølv med fem lag delte opp etter alder, og kvart lag fekk hjelp av ein frå seniorlaget. Sundag er det «teenturnering» for dei som er litt eldre.
