– Moglegheitene er uendelege
Berre kreativiteten set grenser for kva øvingar ein kan gjera i treningsparken i Ålvik.
Det hevdar i alle fall mannen som har teikna apparata, designar Hans Pulles. Pulles har òg gjort det meste av arbeidet med å laga apparata. Han har fått litt hjelp frå elevar ved Kvam vidaregåande skule, som har laga platene som vert brukte til å festa apparata til betongfundamentet ved kunstgrasbanen i Ålvik.
I vår har apparata vore ute på reis for verta varmgalvaniserte og pulverlakkerte. No er dei attende i Ålvik, og arbeidet med å setja delane saman er allereie godt i gang. Planen er at treningsparken skal vera klar til bruk i slutten av juni. Om det vert offisiell opning då eller til hausten, er ikkje bestemt.
Trening for heile familien
Fredag jobba Pulles, Bjørn Otto Wallevik og Francisco Montoya med å setja saman apparata.
– Eg har brukt mykje tid på å teikna apparata og laga dei ulike delane i verkstaden min. Det er alltid spanande å sjå om delane passar saman og fungerer slik eg hadde tenkt. Det gjer dei. Alt stemmer, fortel Pulles.
Fredag såg apparata ut til å vera laga for svært høge personar, men Pulles fortel at betongfundamentet skal dekkjast med eit om lag 40 centimeter tjukt lag med grus. Treningsparken skal innehalda apparat som passar for store og små.
– Dette er ein leikeplass kombinert med ein treningsplass. Her kan generasjonane møtast, vera sosiale og trena saman, seier Pulles.
Apparata er laga for å vara i minst 30 år.
Kostar om lag 300.000
Ålvik idrettslag eig apparata. Camilla Cithona Gangdal er leiar i idrettslaget. Ho fortel at apparata er inspirerte av treningsforma calisthenics.
– Det er ingen rørlege deler på apparata. Treninga er basert på at du skal bruka tyngda til din eigen kropp når du trener eller leikar, fortel Gangdal.
Ho fortel at prisen på treningsparken truleg vert om lag 300.000 kroner. Sidan mykje av arbeidet er gjort på dugnad, hadde prisen vorte langt høgare om laget hadde leigt eit firma til å byggja parken. Prosjektet har fått pengar både frå Elkem Bjølvefossen og Sparebankstiftinga Hardanger. Laget har òg søkt om stønad frå Kvam herad og Sparebanken Vest. Stønaden avgjer kor mykje treningsparken tærer på eigenkapitalen til laget, fortel Gangdal.
