Medaljefest for karategutar
Fire gutar frå Kvam Karateklubb deltok på cup i karate i helga. Alle reiste heim med fleire medaljar kring halsen.
Dette er det fyrste stemnet på om lag to år, fortel styreleiar i karateklubben, Bjørn Vik. Det var Japan Karate Association Norway (JKA Norway) som arrangerte cupen, som fann stad i Fyllingsdalhallen.
Gutegjengen som representerte den lokale klubben, bestod av Johannes Lodden, Mathias Vik, Einar Vik og Brynjar Rosseland. Dei er alle juniorar.
Brynjar deltok i klassen kumite. Der møter to utøvarar kvarandre på matta og skal utføra to slag og eitt spark, fortel Vik. Dei tre andre gutane deltok både i kumite og kata. Kata vil seia at utøvarane skal halda seg til eit mønster dei har øvt på. Og gutane hadde verkeleg øvt.
— Dette var ein kjempegod start! Det er kjekt når borna meistrar idretten, seier Vik.
Lagleiar Jane Moe er samd med Vik. Ifylgje Moe vart det berre arrangert cup for juniorar denne gongen. Stemninga var god, og dei flotte resultata gav meirsmak for gutane, fortel ho.
