Med fotball på timeplanen

Fotballfløyta ljomar utover fotballbana. Piggar klaprar mot asfalten. Skrik fylte av glede og spenning. 118 raudkledde jenter og gutar set seg i ringen rundt midtbana. Dei 16 trenarane er kledde i blått.

Sola skin frå blå himmel under opninga av Tine Fotballskule måndag morgon. I tre dagar skal borna leika og spela fotball.

– Fyrste dagen er mange av borna usikre. Dei vert meir og meir engasjerte for kvar dag. Det er kjekt å sjå at dei finn glede i å spela fotball, seier Viljar Berge Eide.

Unge frontfigurar

Viljar Berge Eide og Håvard Grane Hisdal leiar fotballskulen i Norheimsund for andre året på rad. Saman har dei laga program for dagane, med faste tidspunkt for trening og pausar. Borna vert delte i sju grupper etter alder, og kvar gruppe har to trenarar.

– Kvar morgon startar trenarane med å planleggja aktivitetane som skal gjennomførast i deira gruppe. På slutten av dagen slår ofte fleire grupper seg saman for å spela kamp, fortel Eide.

Dei yngste borna tek i bruk den nye fotballbana. Over det nye kunstgraset trakkar fotballsko i alle regnbogens fargar. Nokre jenter og gutar øver på å sentra ballen mellom seg, medan andre spelar kamp. Trenarane ropar ut beskjedar og oppmuntringar. I tillegg til fotball vert borna aktiviserte med andre leikar som stiv heks og stafett.

Fotballklubbane i både Norheimsund og Øystese har fotballskule denne veka. Deltakarane er mellom 6 og 12 år. Den nye kunstgrasbana på Haugamyr gjev større boltreplass for borna i Norheimsund.

– Me har mykje betre plass enn i fjor. Då var det 138 deltakarar, og alle spela på éin bane. No er det romslegare, så me kan dela i mindre grupper og ha rullerande postar, seier Eide.

Film på lur

Sjølv om fotballskulen opna med strålande sol, er «rektorane» førebudde på dårlig vêr. Då passar trenarane på at borna har nok klede, og at alle får eta nista innandørs.

– Dei yngste står ofte mykje i ro og blir lett kalde. Difor har me ein film i bakhand dersom det byrjar å regna, seier Eide.

Han spelar sjølv fotball, og ønskjer å motivera borna.

– Fotball er sosialt og kjekt. I tillegg er det god trening. Eg håpar borna får lyst til å spela vidare og gå på fotballtrening. Samstundes får borna som er her, koma inn i rutinar og verta klare for skulekvardagen, seier han.

Onsdag reiser deltakarane heim med diplom, t-skjorte, sekk, matboks og drikkeflaske.