– Me treng meir snø
Skitrekka på Kvamskogen er ikkje sette i gang enno. Straumprisane krev taktisk snøkanonbruk.
Dagleg leiar ved Furedalen Alpin på Kvamskogen, Jan Guttorm Skeie, er ein av dei som gler seg over at minusgradene kjem krypande. Alpinsenteret opnar så snart det er nok snø.
Temperaturen ligg på kring minus ti grader, og Skeie har byrja produsera snø med dei 25 snøkanonane som er i trekket. Kunstsnøen er viktig for å kunna opna sesongen tidleg og avslutta seint, fortel han.
Spent på avtalar
I år er det endå viktigare at det er kaldt. Dess kaldare det er, dess meir snø får ein ut av kvar liter og kvar kilowattime.
Skeie har spotprisavtale om straum. Tidlegare hadde han fastprisavtale. Endringa slår ikkje godt ut.
Lengda på sesongen varierer mykje, men ligg på kring fire månader. Det tidlegaste Furedalen har opna, er 2. desember. Det lengste ein har halde ope, er til om lag 1. mai.
Ofte kunne ein hatt ope lenger, men kundane sluttar å koma når det er vår i låglandet.
– Ser du lyst på vinteren?
– Det er vanskeleg å seia, men me er tilbake til ein vinter utan koronarestriksjonar. Det er fint, men me har bekymringar med tanke på straumprisen. Så me er spente på kva for fastprisavtalar staten kjem med. Viss dei er gode nok, vil me gå for det, seier Skeie.
– Ønskjer å opna til jul
Fredrik Tønjum er dagleg leiar i Eikedalen Skisenter AS. Han fortel at det heller ikkje i Eikedalen er kome nok snø til at skisenteret kan opna.
– Det kom rundt 20 centimeter med natursnø på tysdag. Det ser fint ut, men snøen er for lett til at du kan stå på ski. Det vert spanande å sjå korleis vêret vert i neste veke. Dersom vêret er med oss, håpar me å kunna opna i alle fall to heisar til jul, seier han.
Dei høge straumprisane gjer at skisenteret ikkje har råd til å køyra snøkanonane døgnet rundt.
– Under normale forhold ville kanonane ha gått heile tida når det er kaldt. Hadde dei gjort det, hadde me truleg kunna opna no. Me brukte kanonane i fire døgn i førre veke, så får me sjå når me skrur dei på att. Du kan trygt skriva at om ikkje det hadde vore for straumprisane, hadde skisenteret allereie vore ope, seier han.
