– Me kjenner det før start

Rundt klubbhuset på Sjusete aula det av vaksne, born, ski og stavar då HF var oppom laurdag. Høgtalarane spela fengjande musikk, og innimellom songane fanga ei kjend stemme merksemda til både journalisten og dei andre tilhøyrarane.

Arrangør Kvam Langrenn- og Skiskyttarklubb (Kvam LSK) hadde nemleg leigt inn ein profesjonell speaker for helga. Journalist Lidvard Sandven intervjua både små og store, og heldt publikum oppdaterte gjennom renna begge dagane.

– Litt nervøse

Skiskyttarane Sandra Langeland og Marita Tombre Soldal heldt seg nær startområdet og trippa og hoppa for å varma opp like før start. Langeland skulle gå fyrst, og så Soldal. Begge kunne fortelja at dei hadde vore med på fleire renn gjennom vinteren.

– Korleis har det gått?

– Det har gått fint, svara Soldal.

– Heilt ok, svara Langeland.

Jentene var litt nervøse, men ikkje meir enn vanleg. Det brukar å toppa seg før start, men så går det seg til, fortel dei.

– Me kjenner det før start, sa Soldal.

– Så går det over når me har kome i gang, la ho til.

Sandra nikka.

– Ikkje uroa for mildvêr

Både temperaturen i lufta og den berre parkeringsplassen ved skianlegget hinta om at varmare tider er på veg, men det såg ikkje ut til å påverka Silje Laupsa Mo – ein av rennleiarane – i særleg grad.

Klubben, som også har arrangement i løypene neste helg, er ikkje uroa over det milde vêret og solskinet som er meldt dei komande dagane.

– Neste helg vert ei kjempehelg! seier Mo sjølvsikkert.

Minusgrader om nettene vil gjera susen, meiner ho.

Åtte av 19 kvemmingar som deltok i normalrennet laurdag, fekk pallplassering. Både Jon Stuve (G11), Sunniva Henriksen Vestbø (J11) og Andrea Sørheim Almeland (K18) fekk 1.-plass i sin klasse.

Det same gjorde dei i supersprinten sundag. Då stilte 20 kvemmingar til start. 11 fekk pallplassering. Sunniva Henriksen Vestbø (J11), Jon Stuve (G11), Ronja Måkestad (J14) og Andrea Sørheim Almeland (K18) fekk 1.-plass i sin klasse.