Måtte trekkja lag som fylgje av overgangar
Bordtennisspelarane Roger og Jan Roger Andersson har i sommar meldt overgang frå Hardanger Bordtennisklubb til Stord Bordtennisklubb.
Båe har vore svært sentrale spelarar i Hardanger Bordtennisklubb (HB) sidan dei melde overgang frå same Stord Bordtennisklubb (SB) i 2016, skriv klubben. Dei var med på reisa frå 3. divisjon til eliteserien med fyrstelaget, og båe har vunne NM-medaljar og stått for andre sterke prestasjonar.
Kestutis Barauskas har i sommar flytta til Sandnes og kjem til å melda overgang til ein av klubbane i området. Han var ei viktig brikke på laget i 4. divisjon. Kjetil Sætre har meldt overgang tilbake til Figgjo IL. Han var sentral på laget som tok bronsemedaljar i NM for veteranar på Stord i vår.
Jack Feng held fram som HB-spelar, men vert lånt ut til Bergen PIL i 2. divisjon.
Som ein konsekvens av overgangane har HB trekt laga i 1. og 3. divisjon, og held fram i 4. og 5. divisjon.
