Martin tok disken i eigne hender

Dahle overtok stafettpinnen frå Eivind Ringheim Århus, mannen som tok initiativ til å byggja banen. Han bur i Bergen, og fortel at det vart litt for strevsamt å ha hovudansvaret for å fylgja opp banen og aktiviteten på såpass stor avstand.

Til alt hell har Dahle gått motsett veg, etter å ha utdanna seg til barnehagelærar og fått interessa for idretten kveikt i studietida i Bergen. Gradvis har interessa auka, og sidan i vår har han spela veldig mykje. No er han tilsett i Ålvik barnehage, berre eit halvlangt diskkast frå banen han har teke ansvar for som leiar i frisbeegolfgruppa i Ålvik Idrettslag. Frå lunsjrommet kan han faktisk sjå rett bort på dei næraste korgene.

Sjå eit intervju med Martin her:

Mange med i liga

Laurdag var han – på 23-årsdagen sin – hovudansvarleg då Ålvik Idrettslag skipa til dei to avsluttande konkurransane i ein liga som har gått føre seg onsdagar sidan august.

47 spelarar har vore med i «vekegolfen». Dei fem beste av dei sju rundane talde med i samandraget. Allereie før dobbeltrunden i helga, der kring 25 deltok, var det klart at Dag Instanes – «dagekul», som han heiter i diskgolfappen Udisc – hadde vunne med god margin. Like fullt stilte han opp også til dei siste rundane.

Sjølv hoverer han ikkje over suvereniteten; faktisk påpeikar han ikkje eingong at sigeren allereie er i boks før dei to siste rundane når HF i vankunne spøkjer med at alt i verste fall kan kollapsa i siste runde.

Instanes gler seg i staden over kor mange som deltok i konkurransen, og kor mange som orka å gå ut i regn og fire–fem grader laurdag for å vera med på dei siste rundane.

Bak Instanes, som sanka 69 poeng, kom Torje Rykken med 40 og Benjamin Bakke med 37 poeng i den opne klassen. Best av kvinnene var Kristina Hamre med 23 og Mette B. Flotve med 22 poeng. Og i klassen for seniorane, dei over 50, måtte det «omkast» til for å skilje Sverre Linga og Svenn Erik Flotve, som båe hadde 19 poeng. Sistnemnde trekte det lengste strået.

Omtykt nyvinning

Ifylgje Camilla Gangdal i idrettslaget, som skrytte av aktiviteten på Facebook i helga, har den nye sporten slege veldig godt an og vorte mykje større i Ålvik enn det idrettslaget hadde rekna med då banen vart bygd.

Mange – veldig mange – har vore ute og kasta diskar i området ved fotballbanen og Dalselva sidan banen vart offisielt opna 25. mai. Berre i den store Udisc hadde 359 personar i helga registrert totalt 2.641 rundar. Til saman hadde dei gått 6.974 kilometer. I tillegg kjem alle som ikkje har brydd seg med å loggføra innsatsen.

Det stadfestar fleire av dei eldre deltakarane – seniorane, som klassen deira heiter – i Ålvik. Både Atle Kvåle og Sverre Linga vedgår at dei rett som det er tek turen til idrettshuset for å gå ein runde eller to, anten åleine eller saman med kjende og ukjende, og kanskje for å få seg ein dose trim og mental terapi på kjøpet.

Disk før bardisk

Så ille har det vorte, fortel Martin Dahle, at fleire prioriterte å kasta diskar i tussmørket heller enn å gå på pub på Kafé Kraftstasjonen kvelden før dei to avsluttande rundane. Som han elles samanfattar som ein kjempesuksess.

– Det gjekk bra og var kjempekjekt, og eg trur fleire synest det same, seier han.

Planane vidare er å rydda litt skog og justera på enkelte hol – det heiter nemleg ikkje korg, men hol –, mellom anna for å få litt større avstandar. Dessutan har idrettslaget investert i tre korger som skal nyttast til innandørstrening i gymsalen i vinter. Dahle har i tillegg ei von om å skaffa også eit nett til innetrening. Og komande årsmøte i idrettslaget kan koma til å formelt oppretta ei diskgolfgruppe og søkja om medlemskap i Norges Amerikanske Idretters Forbund.

– Kvifor har du sjølv vorte hekta på dette?

– I starten er det ikkje så kjekt, når det går litt til høgre og litt til venstre og du ikkje får det heilt til, men når du får eit godt kast, er det kjempekjekt. Og dess meir du spelar, dess fleire slike kast kjem, og då vert det berre kjekkare og kjekkare, seier Dahle.

Sjå fleire bilete her: