– Målet er 500 deltakarar
Miniatyrtevlinga Lapua Cup vart avrunda med finale i Vangdalsåsen. Fleire lokale skyttarar stakk av med klassesigeren.
Cupen vert skipa til for skyttarlag i eit stort område, nærare bestemt i nedslagsfeltet til skyttarsamlaga Hardanger og Voss, Sunnhordland og Hordaland.
I alt deltok så mange som 418 skyttarar i år, fortel arrangør Chris-André Bolstad Fauske i Hardanger Skyttarlag.
Saman med Henry Øye og Liv Sollesnes har han vore sentral i arbeidet med å skipa til konkurransen. Og ambisjonane hans er større enn dei 418 som var med i år. Til neste vinter vonar Fauske å overtala både Os og Åsane/Hordvik Skyttarlag, som er to av dei største laga i fylket, til å vera med.
– Målet mitt er å få med minst 500 til neste år, seier han.
Lågterskeltilbod
Eit viktig mål med cupen er å senka terskelen for å delta og dimed få fleire med – og gjerne slike som ikkje plar reisa for å delta på stemne. Det oppnår arrangørane ved å leggja til rette for at skyttarlaga kan gjennomføra dei seks innleiande kvalifiseringsrundane på eigen bane.
Dei som har delteke i minst fire rundar, er kvalifiserte for finalen om dei har gode nok resultat. Dei innleiande rundane vart i vinter avvikla i tidsrommet 4. november–12. januar.
I finalen, som altså vart skipa til på banen i Vangdalsåsen i helga, deltok 122 skyttarar i ei rekkje klassar. I finalen gjennomfører alle fyrst eit skyteprogram på 25 skot. Dei beste i kvar klasse får delta i ein «superfinale» der alle stiller med blanke ark.
Finalen går ut på å skyta fem skot i serie og så fem enkeltvise skot i den «høgaste» stillinga klassen har på programmet. Her tel også desimalane, slik at det er mogeleg å oppnå meir enn 100 poeng på dei ti skota. Superfinalistane må elles tola at speakeren snakkar og spekulerer i ymse utfall ikkje berre før og etter, men også medan dei skyt. Presset kan med andre ord verta stort og pulsen høg når det snører seg til.
Finaledagen er delt i tre. Fyrst skyt dei yngste, så dei eldste og til sist seniorane ferdig. På den måten slepp skyttarane å venta i mange timar på finalane. Det einaste aberet er at det ikkje vert så mange tilskodarar på den siste finalen.
– Det var eit knirkefritt arrangement, seier Fauske, som er takksam for både gode medarrangørar og gode sponsorar som gjer tevlinga mogeleg.
Lokale heltar
Fleire lokale skyttarar vann klassen sin. I klasse V55 vart det stor spaning heilt til siste skot, då berre ein tidel skilde dei tre beste. Magne Lysen heldt nervane under kontroll og prikka inn eit nett så godt skot som han trong for å vinna.
Marginen var like knapp for Arve E. Kolltveit frå Hardanger, som vann V65 med 0,1 poeng ned til vossing Lars Kåre Almeland. Junior Tuva Lerfall Alvsåker frå Jondal vart beste junior. Marthe Eide frå Hardanger vart nummer 2 i klasse 2, etter å ha prikka inn 344,8 poeng i finalen.
Kjetil Skår frå Hardanger var suveren i klasse 3–5 og eldre junior. Med 345,3 poeng hadde han 2,4 poeng å gå på ned til stordabu Heine Nes på 2.-plass. Arrangør Fauske, som har skote særs godt i cupen i vinter og låg på 2.-plass samanlagt etter dei innleiande rundane, vart nummer 4.
Vel å merka deltok korkje Liv Sollesnes frå Jondal, som var på topp etter kvalifiseringa, eller Dag Skår frå Hardanger i finalen.
Alle resultat frå finalen finn du her.
Du kan sjå fleire bilete frå Lapua Cup her:
