Må venta litt til med snøkanonar

Den nye fristen er 31. desember, ifylgje eit brev frå Ullensvang kommune.

Det tildelte tilskotet på éin million kroner frå vekst- og strategifondet skal delfinansiera 14 snøkanonar.

I søknaden om utsetjing syner Fonna Skisenter til ei positiv utvikling i drifta. Fullfinansiering av prosjektet var sett som vilkår for tilskotet, og det er oppfylt.

Prosjektet er seinka. Ullensvang kommune har forståing for at arbeidet har teke meir tid enn planlagt, og at det er uråd å starta bygginga av anlegget i vinterhalvåret. Det må difor må venta til hausten 2024.

At prosjektet no er fullfinansiert, samstundes som den økonomiske situasjonen i selskapet er betra og det er gjennomført strukturendringar på eigarsida, er viktige føresetnader for at prosjektet skal lukkast, skriv næringssjef Randi Rykkje.

Halve tilskotet kan utbetalast når søkjaren dokumenterer at minst 50 prosent av prosjektkostnadane er utførte.

Snøkanonane skal produsera 300 kubikkmeter snø i timen og gje éin meter snødjupne over 240.000 rutemeter etter 800 timars drift. Produksjonen vil gje minst tre månader lengre sesong enn i 2023, hevdar Visitfonna.

Trass ei rekordtidleg stenging av skisenteret i 2023 hadde selskapet si nest beste omsetning nokosinne. Det er venta ytterlegare betringar i økonomien i 2024.

Det er planlagt eit breitt samarbeid med Universitetet i Bergen som gjeld forsking og utvikling av Folgefonna med snøproduksjon.

Installering av kanonane er venta å ta 25 dagar, avhengig av vêrtilhøva. Anlegget vil vera klart for produksjon i september eller oktober, ifylgje søknaden.