Må kanskje setja kroken på døra

Styreleiar i klubben, Terje Høysæther, opplyser at han ikkje har fått lov til å starta opp att vanleg drift. Han har likevel fått løyve av kommunelegen til å ha trening med gjeldande reglar for avstand og hygiene.

Det skulle ha vore ei turnering i april, 50 pluss-turneringa, og så står Hardanger siderfestival for tur i oktober. Då kjem det folk frå både Bergen, Haugesund og Stord og spelar. Klubben har òg hatt ein del gjester frå Utne.

Kvam bowlingklubb er ein frivillig organisasjon og har ikkje tilsette. Det er berre dei som har måtta avlysa større turneringar, og som har tilsette, som kan håpa på kompensasjon frå staten.

– Kan gå gale

– Å halda stengt og måtta betala husleige – det kjem til å gå gale viss denne situasjonen held fram og me ikkje får inntekter, seier Høysæther.

– Me kan berre håpa på stønad frå Sparebanken Vest. Me har ikkje fått melding frå idrettsforbundet om at me skal få støtte. Det ser ikkje ut til at me får inn pengar med det fyrste.

– Det er utruleg trist, seier Høysæther.

Laget har om lag 35 medlemer. Dei betalar ein medlemskontingent på 500 kroner i året.

– Men det forslår ikkje. Me har hatt store vedlikehaldsutgifter i det siste. Me må ha inntekter, for elles kan me setja kroken på døra. Det er synd, spesielt for pensjonistgruppa, som bowlar kvar onsdag. Dei seier me aldri må finna på å leggja ned og at tilbodet er utruleg viktig for heile heradet.

Lyt søkja om støtte

Korkje Voss eller Odda har bowlinghall. Det er kjekt å kunna ha dette tilbodet i Kvam, tykkjer Høysæther.

– Men me treng hjelp. Næringslivet var med og støtta oss for to år sidan. Det er der me lyt prøva å få hjelp no òg, viss dette held fram.

Det er likevel viktig at laget har fått lov å trena avgrensa. Ein av ungdomane, Gaute Melstveit, har lege på 7.-plass i Noreg.

– Han er utruleg flink. Ungdomane dreg med seg fleire. Viss dei mistar tilbodet, har dei ikkje noko å finna på om kveldane, seier leiaren.

Han vonar bowlinga skal koma i gang att, men det ser ut til å dra ut.

– Viss det vert opna for fotball, er det sikkert mogleg for bowling òg. Me får sjå, og vona det beste, seier Høysæther.