Lokal trenarduo i ung alder

Eide og Øvsthus har vakse opp i Norheimsund. Dei er fødde i år 2006 og har fylt 18 år. Dei har vore kameratar så lenge dei kan hugsa. No går kameratane i 3. klasse på Framnes Kristne Vidaregåande Skule. Dei har vore aktive fotballspelarar i Norheimsund Fotballklubb og på fleire av samarbeidslaga til Norheimsund/Øystese. No har begge ein pause frå spelarkarrieren for å prioritera trenarvervet.

Held gjerne fram

Viljar og Jonas har delt hovudtrenaransvaret for G16-laget i snart to sesongar. Til våren vil laget mest sannsynleg vera påmeldt i G19-avdelinga, fortel dei.

– Eg og Jonas vil gjerne halda fram med laget til våren, fortel Eide.

Å samarbeida som hovudtrenarar har vore kjekt, synest dei. Dei trivst i lag med kvarandre. Eide omtalar samarbeidet som lettvint. Dei kan vera ueinige, men kjem alltid fram til løysingar begge kan leva med.

– Me er ein god trenarduo, meiner eg. Me har aldri krangla, seier Eide og ler.

Han har tidvis spela for A-laget til Øystese/Norheimsund i år. No prioriterer han å trena seg opp til å prøva å verta fallskjermjeger i Forsvaret, vera fotballtrenar og fullføra vidaregåande skule. Jonas har òg vore aktiv fotballspelar i år. No skal han fullføra vidaregåande og fokusera på trenarvervet. Neste skuleår vil han studera vidare på Bildøy Bibelskule, fortel han.

Trenar to år yngre spelarar

Spelarane på laget er fødde i 2008, og trenarane i 2006. Sjølv om trenarane er berre to år eldre enn spelarane, synest dei at dei har opparbeidd seg den respekten som lyt liggja til grunn. Eide påpeikar at dei har hatt dialog med spelarane om korleis dei ynskjer at laget skal leiast.

– I byrjinga merka me at standardane var dårlege. Fleire av spelarane kom for seint og slurva. Me gav spelarane valet om å trena seriøst eller halda fram med fjasete treningar, forklarar Eide.

Spelarane gav beskjed om at dei ynskte seriøse treningar. Då la hovudtrenarane til rette for det. Eide fortel at dei påpeika for spelargruppa at alle måtte leggja inn ekstra innsats. Om det var naudsynt, kunne trenarane vera ekstra tydelege i beskjedane, ettersom dei hadde ein avtale med spelarane i botnen, fortel Viljar.

– Me har gjort det som må gjerast for å ha ein viss kontroll. Eg synest det har fungert, seier Eide.

Trenarane er opptekne av at spelarane skal kjenna seg lytta til. Av og til kan spelarane ha innspel til kampplanane, fortel Eide. Då vert forslaga lytta til og evaluerte av trenarduoen. Eide og Øvsthus ynskjer at terskelen for å koma med innspel skal vera låg.

G16-laget til Norheimsund/Øystese spelar i 3. divisjon. Sundag vann laget 2–1 på heimebane mot Nordre Holsnøy, etter mål av Vinjar Voster og Jonar Tonning Kjøsnes. Øystese/Norheimsund ligg på 4.-plass av totalt 10 lag. Nordre Holsnøy ligg nest sist.