Liv Sollesnes enda på 8.-plass i «Mestermøte»

Hans Kristian Wear vann klasse 3—5 med heile 350 poeng. Sollesnes fekk 346 og vart nest beste kvinne, etter å ha fått ein niar så nær tiaren som mogeleg i finalen.

Sollesnes seier til HF at ho ikkje vil skulda på andre enn seg sjølv, men slår fast at ho sleit litt med å sjå blinken skikkeleg då det mørkna og skivene vart punktopplyste. Resultatet vart «gråe» skiver og ein skeiv serie, etter at prøveskota hadde sete midt i blinken. Jondølingen var likevel ikkje arg etter finalen.

— Eg er veldig nøgd med eiga skyting og hadde uansett ikkje vunne, seier ho.

Ei stund hadde jondølingen leiinga i den innleiinga skytinga tidlegare tysdag, men sterke skyttarar på slutten av dagen sende jondølingen litt ned på lista før finalen tysdag kveld.

Den NRK-sende tevlinga Mestermøte på Elverum er plasteret på såret etter den andre avlysinga på rad av Landsskyttarstemnet. Her samlast ei rekkje av dei aller beste skyttarane i landet.

Sollesnes tapa 2 poeng på serien i ståande stilling og 1 poeng på «grunnlaget» i den innleiande skytinga. Det heldt altså til å leia ei stund, men i dei sterke laga mot slutten av dagen leverte ei rekkje skyttarar solide resultat.

Med i vinnarkampen

Sollesnes ligg etter den fyrste avvikla runden i Frende Cup, som vart avvikla kort tid før Mestermøte, på 6.-plass samanlagt. I Åmot, Nordskogbygda og Trysil presterte jondalsskyttaren 349, 347 og 346 poeng. Nivået er høgt; sjølv ikkje 349 heldt til å vinna stemnet. Sollesnes har 1.042 poeng totalt og ligg berre eitt bak dei tre mennene som ligg på toppen av lista.

Trass vinnarsjansane har jondølingen enno ikkje bestemt seg for om ho tek den lange turen til den siste cuprunden på Sunnmøre den siste helga i august. Han er nemleg midt i fruktinnhaustinga — og då lyt fruktdyrkaren på Solesnes ha hjelp frå andre for å koma seg laus frå arbeidet.

Ho seier at ho som fylgje av koronatiltaka og dei manglande arrangementa har fått høve til å trena mykje i vinter, særleg på 15-metersbanen i Gjeskadalen. Sjølv om det er kjekt å konkurrera, finn ho motivasjon til å trena på eiga hand. Om våren har ho mindre tid, men ho har vore på banen kvar sundag og trena i ro og mak.

— Lysta til å skyta er veldig stor, seier ho.

Nest best av dei lokale heltane i cupen er leiar Dag Skår i Hardanger skyttarlag, som har 1.020 poeng etter dei fyrste rundane. Lagkamerat Chris-André Bolstad Fauske leverte to gode stemne med 344 og 345, men eit mislukka stemne med 238 som resultat sende han langt ned på samanlagtlista. Skår seier til HF at han ikkje reknar med at andre enn Liv Sollesnes vil prioritera den lange turen til Sunnmøre.

Varierande effekt

Dag Skår i Hardanger skyttarlag seier resultata i Mestermøte på langt nær er gode nok, men påpeikar samstundes at dei kan ha ei god forklaring. For medan ein del skyttarar, gjerne dei som allereie var ganske gode, har nytta høvet til å trena, har andre nytta pandemitida til å ta seg ein pause.

— Toppnivået i dag er heilt vilt og har aldri vore så bra. Mange av dei mest aktive har trena godt og lagt til alen, seier Skår.

Han slår fast at all uvissa rundt restriksjonane det siste halvtanna året har vore øydeleggjande, og seier deltakinga generelt er meir laber enn ho burde ha vore. Særleg slit ein med fråfall i breiddeskyttarane på seniornivå — særleg i klasse 2, 3 og 4 — og i ungdomsklassane.

Når årskull går glipp av heile klassenivå og til dømes ikkje får med seg overgangen frå klasse eldre rekrutt til klasse junior, som inneber at ein må opp på kne når ein skyt, får det konsekvensar. I tillegg har Landsskyttarstemnet altså vorte avlyst to år på rad.

— Ikkje alle kan gjera det godt der, men det er eit viktig mål. Det er meir krevjande å trenga til noko du ikkje veit om vert arrangert, seier han.

På den positive sida slår han fast at den generelle aktiviteten og drifta trass går tolleg bra.

Neste helg vert samlagsstemnet skipa til i Vangdalsåsen.

Dreiv indremedisin

I Jondal har aktiviteten internt i laget vore bra i pandemiperioden, fortel Liv Sollesnes. Laget har skipa til interne konkurransar og skipa i vår til ein treningscup der skyttarane skyt fullt program ein gong i veka.

— Korona har ikkje vore veldig negativt for oss, sjølv om me ikkje kunne ha veldig fokus på rekruttering. Me har hatt ein fast gjeng som har vore med, seier ho.

Til hausten er planen å satsa meir på å lokka nye til geværet, mellom anna med skyteskular.

Jondal skyttarlag skal skipa til samlagsstemnet i feltskyting i september, som er utsett frå i vår. Også i fjor vart det gjort slik.

Fleire var med

Også jondølingane Bjarne Sollesnes og Bjørnar Wikane frå Jondal hadde kvalifisert seg for deltaking i Mestermøte. Dei fekk høvesvis 236 og 238 poeng.

For Hardanger skyttarlag skaut Harald Brekke (238), Chris-André Bolstad Fauske (239), Dag Skår (241) og Kjetil Skår (244) i banetevlinga. Kjetil Skår såg ei stund ut til å kunna få finaleplass, men enda til sist for langt nede på lista.

For å få delta, måtte skyttarane i klasse 3—5 skyta 242 eller fleire poeng på eit stemne registrert seinast 1. august.