– Litt dramatikk, men det går bra
Det er ikkje avdekt spesielle problem med helsa til Arne-Kristian Teigland etter kollapsen i går.
Polfararen frå Øystese måtte avbryta turen frå Hercules Inlet til Sørpolen torsdag, eit par hundre kilometer frå målet og mogelegvis ei rekordtid. Han svima av på isen og måtte setja opp og søkja ly i teltet då han kom til seg sjølv att.
Etter ein del timar i teltet vart han henta med fly til ALE-basen Union Glacier, som kan skilta med antarktisk luksus som mellom anna legar.
Konklusjonen etter ein medisinsk sjekk var at Teigland var kald då han kom og at blodtrykket var noko lågt, men at det elles såg bra ut så langt. Det fortel medietalsmann Rune Mo-Bjørkelund til HF fredag kveld.
Fredag kveld vart det publisert ein filmsnutt i sosiale medium der «AK» konstaterer at ikkje alle historier endar med flagget over hovudet – nokre endar i staden med «nåse mellom skituppane».
Han skildrar seg i videoen som ein litt sliten mann, men forsikrar om at det går bra.
– Eg gav alt. Livet skjer, men det går fint, seier kvemmingen smilande i sola.
Ak skal truleg fly til Chile laurdag. Han kan mogelegvis koma til Noreg tysdag, fortel Mo-Bjørkelund.
