Lærte å berga kompisen

Kurshaldar Halle Vangdal opplyser at kurset byggjer på padleforbundet sitt grunnkurs, med alle dei viktigaste elementa. Målet med kurset er å gjera deltakarane kjende med utstyret og kajakken.

— Det er dei heilt grunnleggjande kunnskapane, seier Vangdal.

Kurset skulle eigentleg gå føre seg på fjorden, men sterk vind og bølgjer gjorde til at det vart flytta i siste liten. Judith Elisabeth de Haan, som er fersk i styret i kajakk-klubben, trur mange har godt av eit kurs.

— Det er mange som har ein kajakk, men ikkje veit korleis dei skal bruka han, seier ho.

Gjekk over ende

De Haan deltok sjølv på kurset. Ho syntest at det gav godt utbyte. Det gjorde også Jan Ove Børve.

— Me får god opplæring, seier Børve.

Det var mange av dei interesserte som ikkje hadde høve til å delta denne helga. Difor var kurset berre halvfullt.

— Ein får betre individuell oppfylging når me ikkje er så mange, seier Børve.

Også sonen til Børve, John Børve, deltok. Han var fyrstemann til å ramla i Movatnet.

— Då fekk me lært litt om redning òg, seier ein lattermild Vangdal.

Håpar på nytt kurs

Vangdal, som opphavleg kjem frå Norheimsund, har drive med kajakk i 30 år. Dei ti siste åra har han vore instruktør i osloområdet, der han bur. Han synest det er fint at nokon ynskjer å ha eit slikt tilbod lokalt.

— Det er kjekt å koma heim og halda kurs, seier han.

På grunn av pågangen til kurset vonar de Han at klubben skal få til eit nytt kurs til våren att.

Med seg i styret i klubben har ho Sigmund Vereide og Molina Mo.