Ladar opp til ny sesong

Sju born og unge nytta delar av helga 27.–28. august i skianlegget på Sjusete, der dei fekk innføring i det mest grunnleggjande om skiskyting. Dagane bestod av ein kombinasjon av teori i skistova og aktivitetar og skytetrening på standplass.

– Eg må læra meg å få kontroll på pusten og å sikta, seier Philiomene Möller.

Frå kiwi til skiskyting

13-åringen var den eldste deltakaren i gruppa. Ho og familien kjem opphavleg frå Tyskland, men etter å ha budd i New Zealand i nokre år, flytta dei til Kvam i januar. Førre sesong prøva ho og broren Balthasar (11) langrenn. Denne sesongen er planen å byta ut klassiskskia med skeiseski og våpen.

– Det er enklare å gå klassisk enn å skeisa, men skiskyting verkar moro, så eg trur det vert kjekt, seier Philomene.

Medan ho er gamal nok til å skyta med reim, lyt broren ha våpenet på bukk. Det tykkjer han er litt kjedeleg.

– Det ser kulare ut med reim, konstaterer han.

Tryggleik er kjernen

Gerd Ingrid Dukstad Norheim, leiar i klubben i Kvam, fortel at målet med skiskyttarskulen er å gje nye utøvarar og føresette informasjon om våpenhandtering- og tryggleik. Strengare våpenreglar fører til at kurset er naudsynt for at ein skal kunna vera med på treningar og stilla på renn, forklarar ho.

Dersom deltakarane på skiskyttarskulen melder seg inn i klubben, vil han ha kring 30 aktive medlemer den komande sesongen.

Dugleik og leik

Skytetrenar Åsne Ulvund frå Myrkdalen stilte opp for klubben i Kvam for tredje året på rad. Ho seier fleire av kvemmingane er gode til å skyta, og har inntrykk av at rekrutteringa lokalt er bra. Ho prøver å leggja opp treninga slik at ferskingane får både dugleik og leik på kjøpet.

– Det skal ikkje vera for seriøst. Dei skal både ha det kjekt og kunna utvikla seg som utøvarar, men dei må ha lyst til det sjølve, seier ho.

Ho seier at nøkkelord for å verta ein god skiskyttar er fokus og ro. I tillegg må ein finna den rette kombinasjonen av tempo i sporet og på standplass. Ein kan vera passeleg god både til å gå på ski og skyta, og likevel vinna, påpeikar ho.

Sjølv la ho skia og geværet på hylla for to år sidan, etter å ha vore aktiv i 13–14 år. I si tid vart ho noregsmeister i klassen for 18- og 19-åringar.

– Eg var ein god skyttar, men litt dårlegare i sporet.

– Ingenting er som å gå bak nokon inn på standplass og fyrst ut?

– Det er den beste kjensla, seier Ulvund og ler.

HF gjer merksam på at journalist Mari Ulvund er syster til skytetrenar Åsne Ulvund. Red.