La seg i selen for nye belte
Den yngste medlemen i Kvam Karateklubb, Caroline (3), var blant dei som graderte seg til nytt belte denne helga.
Det fortel Helge Fonneland Bu, som er hovudinstruktør i klubben. Graderingshelga starta fredag kveld og heldt fram til ut på dagen laurdag. 35 medlemer i alderen 3 til 54 år var med.
Under graderinga går utøvarane gjennom ein slags eksamen, fortel Bu. Kommandoar lyt fylgjast og gjerast riktig, og ein lyt meistra dei tekniske ferdigheitene og pensumet til den fargen på beltet ein skal gradera seg til.
Graderinga er delt inn i tre delar – «kihon», «kata» og «kumite». Det vil seia å visa grunnleggjande teknikkar og å fylgja eit slags sett med mønster, og til slutt skal utøvarane i kamp.
– Det er ein kamp med kontroll, der utøvarane veit på førehand kva dei skal gjera, seier Bu.
Etter at dei tre formene er gått gjennom, får deltakarane vita om dei har bestått.
– Gjeld å finjustera
Den siste helga i november var to av klubbmedlemene – Vetle Neteland og Mathias Vik – på gradering i Sandslihallen i Bergen. Der gjekk dei opp til det fyrste svarte beltet, og fekk bestått.
– Kva vil det seia å ha svart belte?
– Det viser viljen du har til karaten – at dette er noko du står og brenn for. Det har mykje med haldningar å gjera. Ein lyt trena nok og delta, seier Bu.
Det finst ti nivå av det svarte beltet, og mange stryk når dei skal gradera, fortel han. Det gjeld gjennomsnittleg halvparten eller meir av dei som prøver seg på svart. Som regel er grunnen at ein heilt enkelt treng å trena meir. At ein ikkje er heilt klar, rett og slett. Då gjeld det å finjustera og finpussa teknikkane, så går det som oftast bra på andre forsøk, seier Bu.
12 med svart
Dei svarte belta til Neteland og Vik vart delte ut under ein belteseremoni laurdag. Då samlast klubben, og dei graderte set seg ned med hovudinstruktøren. Dei graderte tek så av seg det brune beltet og får overlevert det svarte. Beltet vert teke på, og så held instruktøren ein gratulasjonstale.
I sommar var det tre jenter i klubben som fekk det fyrste svarte beltet. No er dei til saman 12 utøvarar i klubben med svart belte.
Klubben har to interne graderingar i året. Dessutan deltek ein del også i nasjonale graderingar – såkalla «gasshuku» – i Bergen og i Oslo.
