Kvemmingar er klare for Norway Cup
Laurdag vert hovudstaden fylt opp av unge fotballspelarar frå både inn- og utland når Norway Cup går av stabelen. To lag frå Kvam er med.
Samarbeidslaget G16 frå Norheimsund og Øystese deltok på turneringa i fjor òg.
– Det gjekk veldig fint! Ungdomane oppførte seg eksemplarisk, fortel Synnøve Ones Rosales.
Ho er forelder og har administrativt ansvar for laget — rolla som tidlegare vart kalla «oppmann». I år skal 13 ungdomar delta, og laget skal ha sju spelarar på bana.
Mykje moro
Det vert tid til andre ting enn fotball. Gjengen har planar om å vitja Tusenfryd, køyra gokart og sjå eliteseriekamp.
– Det er kjekt med ei veke i Oslo. Turen vert ferie for mange, fortel Rosales.
Ungdomane skal spela fire innleiande kampar og minst éin kamp i sluttspelet. I fjor rauk laget ut i den andre sluttspelkampen.
– Me vonar å koma minst like langt i år, seier Rosales.
Ho er kjempeimponert over kor godt organisert Norway Cup er. Både måltid, overnatting og kampoppsett er oversiktleg og greitt. Det er mykje å halda styr på med om lag 30.000 deltakarar.
– Turneringa er kjempesvær! Det er mykje som skjer, både sosialt og fotballrelatert, fortel Rosales.
Fekk plass
Også G17-laget frå Norheimsund og Øystese skal vera med på den store fotballfesten. Laget stiller med 15 spelarar. Forelder Leiv Ingmar Kaale trur det vert ei bra veke i storbyen.
– Norway Cup er eit kjempekjekt arrangement! Ungdomane gler seg, fortel han.
Laget har ikkje delteke på ei så stor turnering før. Mykje vart avlyst på grunn av korona, og Kaale tykkjer det er stas at dei fekk moglegheita i år. Plassane vart fort fulle, og mange lag enda på venteliste.
– Det gjekk greitt med påmeldinga vår. Heldigvis var me tidleg ute, seier Kaale.
Fleire foreldre vert med til Oslo. Dei hjelper til med det praktiske og heiar frå sidelina. Ifylgje Kaale er det viktig å finna på kjekke ting saman også utanom fotballen. Når det gjeld fotballkampane, er målet å gjera sitt beste.
– Me kjenner ikkje motstandarane, men ein møter ofte tøff motstand i slike turneringar. Me får sjå korleis det går, seier Kaale.
Kvemmingane reiser med rutebuss og privatbilar til Oslo. Både G16- og G17-laget skal overnatta på Kampen skule.
