Kvemmingar deltok i motbakkeløp
Fire representantar for Kvam stilte på startstreken då motbakkeløpet Kvasshovden opp i Ulvik vart arrangert for 14. gong i helga.
Over 220 personar la bak seg dei 1.030 høgdemetrane frå sentrum i Ulvik til toppen av Kvasshovden laurdag. Av dei 80 deltakarane som stilte opp i konkurranseklassen, var fire av dei frå Kvam.
Sondre Svåsand Måge representerte Strandebarm IL. Han deltok i klassen for 18—19 år gamle menn. Strandebermingen kom til topps på tida 1.02.42 og vart nummer 2 i klassen.
Erlend Drivenes kom på 5.-plass i klassen for menn mellom 23 og 34 år. Han sprang på tida 59.07. Drivenes representerte Tørvikbygd IL. Sambuaren hans, Lene Hollund, deltok i kvinneklassen i same aldersgruppe. Hollund kom på ein 2.-plass med tida 1.12.35. Ho sprang for BFG Bergen Løpeklubb.
Torild Kveberg, som sprang for Øystese IL, kom fyrst over målstreken av dei to kvinnene som deltok i klassen for kvinner mellom 55 og 59 år. Kveberg kom seg til topps på tida 1.26.31.
Vinnartidene var det sambuarane Halfdan-Emil Færø og Karoline Holsen Kyte som stod for. Færø, som representerte Varegg Fleridrett, deltok i klassen menn 23—34 år og sprang på tida 47.53. Kyte, som deltok i klassen for kvinner i same aldersgruppe, kom i mål på tida 57.55. Ho sprang for Førde IL.
Det 7,5 kilometer lange motbakkeløpet vart arrangert for 14. gong. I mosjonsklassen var det kring 140 påmelde. I ei pressemelding kjem det fram at arrangøren var godt nøgd med deltakartalet, særskilt med tanke på at løpet ikkje var ein del av noregscupen i motbakkeløp, slik det har vore ved tidlegare høve.
