Kvemming til topps
Fire skiskyttarar frå Kvam stilte til start då junior-NM og noregscup for seniorane vart arrangert på Oppdal i helga. Malin Auganæs Bergtun gjekk heilt til topps.
Pallplasseringa kom fyrst laurdag. I fredagens sprint stilte juniorane Hedda Høen Mo og Andrea Sørheim Almeland i Kvam Langrenn- og Skiskyttarklubb til start i klasse K18. Almeland fekk 1 bom og kom i mål på tida 21.15,5, om lag 2,5 minutt bak vinnaren. Det heldt til 13.-plass. Mo hadde 3 bom, kom i mål på 23.44,3 og enda på 23.-plass.
Bergtun gjekk fellesstart fredag ettermiddag, og enda med totalt 5 bommar. Tida 41.25,9 gav henne 9.-plass, 2 minutt og 40 sekund bak vinnaren.
Laurdag kvikna Bergtun til. Med feilfri skyting og godt driv kom kvemmingen fyrst i mål på sprinten. Sigeren var ein stor opptur etter fredagen.
– Det er ei god kjensle når eg får det til å klaffa, og spesielt godt er det med fullt hus både liggjande og ståande. Skikkeleg full klaff! seier Bergtun måndag.
Vêret var til tider utfordrande gjennom helga. Treninga torsdag vart avlyst, og renn vart flytta på. Det gjorde at Bergtun kjende seg litt sliten før rennet laurdag.
– Kva gjorde at du likevel klatra til topps?
– Det var spesielt skytinga som fungerte bra. Eg klarte å fokusera betre og konsentrera meg om meg sjølv. Det er enklare på ein individuell start enn på fellesstart, seier skiskyttaren.
Almeland deltok i fellesstarten laurdag, og gjekk inn til 14.-plass.
Arrangøren skildra sjølv arrangementet som fire dagar med mykje vêr og solide prestasjonar. Nokre tårer vart det, men mest smil og idrettsglede.
