Det snart ti år gamle kunstgraset i Øystese er i dårleg stand. Her ser me målvakt Eirik Botnen i nærkontakt med matta i haust.

– Kunstgras må bytast ut

Kunstgraset på fotballbanen i Øystese, som vart lagt i 2012, held ikkje lenger mål. På banen i Norheimsund er tilstanden noko betre.

Håkon Norheim
Journalist
Publisert Sist oppdatert

I Øystese har skøytar losna, og det er rifter i kunstgraset. I tillegg vantar granulatfangarrister. Det manglar òg eit system for å fjerna granulat som har kome utanfor barrierane.

Det konstaterer synfaringsansvarleg Tore Thorsen i Hordaland Fotballkrins etter ei synfaring.

Banen har ei rekkje manglar etter forskrift for kunstgrasbanar. Det er planlagt å skifta ut eksisterande kunstgras i 2022.

— Då bør desse manglane utbetrast, skriv Thorsen.

NFF tilrår fylgjande tiltak i Øystese

• Det bør opprettast ein fysisk kant rundt banen som hindrar granulat i å koma utanfor anlegget der slik kant manglar i dag.

• Dagens inngangsbom bør erstattast med ein køyreport og gangport.

• Det bør plasserast ein granulatfangar både i køyreinngangen og ganginngangen.

• Opningar i gjerdet bør lukkast for å styra trafikken inn og ut av banen. Alternativet er å plassera granulatfangarar der personar kan gå ut og inn.

• Anten må ein opparbeida eit asfaltert areal for snødeponi, eller så må brøyta snø lagrast inne på kunstgrasmatta. Alternativt må ein lata vera å brøyta.

• Viss det vert etablert overvassrister, må desse utstyrast med filterposar.

Thorsen konkluderer med at ein ved rehabilitering av kunstgrasmatta må etterleva forskrift for kunstgrasbanar.

Med på synfaringa var også André Laupsa og Denis Ljubovic frå Øystese Fotball og Reidun Kjosås og Stein Rykkje frå Kvam herad.

— Bør byggja kantmur

Thorsen har òg vore på synfaring også på kunstgrasbanen i Norheimsund. Denne er i noko betre stand.

Også kunstgrasbanen i Norheimsund har manglar, men tilstanden er betre enn i Øystese.

I Øystese er noko granulat kome utanfor tryggleikssonene til banen, medan dette problemet er ubetydeleg i Norheimsund. Banen i Norheimsund har likevel fleire manglar, mellom desse granulatfangarrister.

Forskrifta seier at heile banearealet skal omsluttast av kantmur. Thorsen meiner det kan sløyfast der banearealet vert avslutta mot fjellskjering, murar og bratt terreng ned mot banen.

På denne banen er det føreteke nokre improviserte løysingar som ikkje stemmer 100 prosent med forskriftene.

— Men så lenge det fungerer, er det etter vår meining hovudsaka, skriv Thorsen i rapporten.

NFF tilrår fylgjande tiltak i Norheimsund

• Det bør byggjast ein kantmur utanfor det planlagde snødeponiet på kortsida ved inngangen med eit gjerde som styrer trafikken mot éin inngang.

• Det bør setjast opp ein køyreport og ein gangport ved inngangen til banen.

• Ein bør laga til granulatrister ved køyreporten og gangporten og elles ved alle andre inngangar for publikum og spelarar.

• Det bør etablerast eit snødeponi. Alternativt må snøen lagrast på kunstgrasmatta, eller ein må sløyfa brøyting.

• Det bør koma opplysingsskilt om miljøtiltaka.

• Dersom kummane ikkje vert dekte til med kunstgrasmatter, må det setjast ned filterposar.

Til stades på synfaringa i Norheimsund var også Sverre Aksnes frå Norheimsund Fotballklubb.

Banen i Norheimsund er eigd av Norheimsund Fotballklubb, i Øystese er banen eigd av Kvam herad.

idrettsanlegg sport fotball
Laga med Labrador CMS