Koronaprega karusell gjekk inn for landing
To av dei åtte løpa i Vinterkarusellen i Strandebarm vart avlyste på grunn av smitteverntiltak.
Dermed vart avslutningstevlinga tysdag kveld det sjette i staden for det åttande løpet i rekkja denne vinteren. Folk i alle aldrar deltok i fint og klart vêr, opplyser Strandebarm Idrettslag i ei pressemelding.
Vanlegvis har ein hatt ein avslutningsseremoni på skulen etter siste løp. I år vart han forenkla; medaljar til alle vart delte ut rett etter målgang i den fire kilometer lange løypa. I tillegg vart mange premiar trekte og fordelte.
Håkon Myklebust Skjelnes, som pendlar til løpet frå Rosendal og har vunne fleire gonger i vinter, kryssa målstreken fyrst etter 14.18 minutt. Ove Måge var nest snøggast med 16.35. I kvinneklassen vart Amalie Svåsand Måge og Torild Kveberg dei to beste med høvesvis 18.04 og 18.13.
I alt har kring hundre personar delteke på karusellen i år. Kvart løp har damla om lag femti.
Det neste arrangementet friidrettsgruppa i idrettslaget planlegg, er eit seriestemne i starten av mai.
